واشنگٹن: امریکی میڈیا رپورٹس کے مطابق ٹرمپ انتظامیہ ایران کے منجمد مالی اثاثوں کو خلیجی اتحادی ممالک میں تعمیرِ نو اور انفراسٹرکچر کی بحالی کے منصوبوں کے لیے استعمال کرنے کے امکان کا جائزہ لے رہی ہے، جس سے تہران اور واشنگٹن کے درمیان جاری سفارتی مذاکرات مزید پیچیدہ ہونے کا خدشہ پیدا ہو گیا ہے۔

بین الاقوامی میڈیا کے مطابق امریکی محکمہ خزانہ کے بعض اعلیٰ حکام نے تجویز دی ہے کہ ایران کے منجمد فنڈز کو خلیجی ممالک میں ان نقصانات کے ازالے کے لیے استعمال کیا جائے جنہیں امریکا ایران سے منسوب سرگرمیوں کا نتیجہ قرار دیتا ہے۔

رپورٹس میں بتایا گیا ہے کہ امریکی وزیر خزانہ اسکاٹ بیسنٹ نے متعلقہ اداروں کو خطے میں ہونے والے نقصانات کا تفصیلی تخمینہ لگانے اور مستقبل میں ممکنہ مالی ضروریات کا جائزہ لینے کی ہدایت کی ہے۔

یہ پیشرفت ایسے وقت میں سامنے آئی ہے جب ایران نے امریکا کے ساتھ جاری مذاکرات میں اپنے منجمد اثاثوں تک فوری رسائی کو بنیادی شرط قرار دیا ہے۔ ایرانی حکام کے مطابق کسی بھی ممکنہ معاہدے کے لیے کم از کم 24 ارب ڈالر مالیت کے منجمد اثاثوں کی واپسی ناگزیر ہے۔

تہران کا مؤقف ہے کہ یہ رقوم ایران کی قانونی ملکیت ہیں اور ان پر عائد پابندیاں غیر منصفانہ ہیں، جبکہ امریکی حکام کا کہنا ہے کہ ان فنڈز کو خطے میں انفراسٹرکچر کی بحالی اور ممکنہ نقصانات کے ازالے کے لیے استعمال کیا جا سکتا ہے۔

امریکی میڈیا کے مطابق اس تجویز نے دونوں ممالک کے درمیان اعتماد کے فقدان کو مزید نمایاں کر دیا ہے۔ ماہرین کا کہنا ہے کہ اگر اس منصوبے کو عملی شکل دی جاتی ہے تو اس سے نہ صرف ایران اور امریکا کے درمیان جاری سفارتی تعطل مزید گہرا ہو سکتا ہے بلکہ خلیج فارس میں موجود کشیدگی میں بھی اضافہ ہو سکتا ہے۔

تجزیہ کاروں کے مطابق منجمد اثاثوں کا معاملہ مستقبل میں کسی بھی ممکنہ معاہدے کی راہ میں سب سے بڑی رکاوٹ بن سکتا ہے، کیونکہ ایران اسے اپنی معاشی خودمختاری سے جوڑتا ہے۔ تاہم امریکی حکومت کی جانب سے اس تجویز پر تاحال کوئی باضابطہ اعلان سامنے نہیں آیا، البتہ حکام کا کہنا ہے کہ تمام قانونی آپشنز زیر غور ہیں۔