اسلام آباد: وزیراعظم شہباز شریف سے بیلاروس کے وزیر توانائی ڈزینس ماروز نے ملاقات کی، جس میں دونوں ممالک کے درمیان تجارت، صنعت، زراعت، بینکاری، افرادی قوت، ٹرانسپورٹ اور توانائی سمیت مختلف شعبوں میں تعاون کا جائزہ لیا گیا۔

وزیراعظم شہباز شریف نے بیلاروسی وزیر توانائی اور ان کے وفد کا خیرمقدم کرتے ہوئے صدر الیگزینڈر لوکاشینکو کے لیے نیک تمناؤں کا اظہار کیا۔ ملاقات کے دوران دونوں رہنماؤں نے قیادت کی سطح پر ہونے والے فیصلوں کو عملی شکل دینے کے لیے باہمی رابطوں اور تعاون کو مزید فروغ دینے کے عزم کا اعادہ کیا۔

وزیراعظم نے اسلام آباد میں منعقد ہونے والے پاکستان اور بیلاروس کے نویں مشترکہ وزارتی کمیشن کے اجلاس کے نتائج پر اطمینان کا اظہار کیا۔ انہوں نے کہا کہ اجلاس کے دوران ہونے والی مثبت پیش رفت دونوں ممالک کے درمیان بڑھتی ہوئی شراکت داری کو مزید مضبوط بنانے میں معاون ثابت ہوگی۔

شہباز شریف کا کہنا تھا کہ مشترکہ وزارتی کمیشن کے اجلاس میں کیے گئے فیصلوں سے دوطرفہ تعاون کو عملی بنیادوں پر آگے بڑھانے اور دونوں ممالک کے عوام کے لیے اس شراکت داری کے ثمرات یقینی بنانے میں مدد ملے گی۔

دوسری جانب بیلاروس کے وزیر توانائی ڈزینس ماروز نے پرتپاک استقبال پر وزیراعظم کا شکریہ ادا کیا اور بیلاروسی قیادت کی جانب سے نیک تمناؤں کا پیغام پہنچایا۔ انہوں نے وزیراعظم کو مشترکہ وزارتی کمیشن کے اجلاس کے دوران ہونے والی اہم پیش رفت سے بھی آگاہ کیا۔

اس سے قبل پاکستان اور بیلاروس کے درمیان نویں مشترکہ وزارتی کمیشن کا اجلاس اسلام آباد میں منعقد ہوا تھا، جس میں دوطرفہ تعاون کو مزید وسعت دینے اور مختلف شعبوں میں عملی اقدامات پر اتفاق کیا گیا۔