اسلام آباد: حکومت نے یومیہ بنیاد پر پیٹرولیم مصنوعات کی قیمتوں میں ردوبدل کرتے ہوئے 30 جولائی کے لیے پیٹرول کی قیمت میں معمولی کمی جبکہ ہائی اسپیڈ ڈیزل اور مٹی کے تیل کی قیمتوں میں اضافہ کر دیا ہے۔

پیٹرولیم ڈویژن کی جانب سے جاری کردہ نوٹیفکیشن کے مطابق پیٹرول 75 پیسے فی لیٹر سستا کیا گیا ہے، جس کے بعد نئی قیمت 335 روپے 6 پیسے فی لیٹر مقرر کر دی گئی ہے۔

دوسری جانب ہائی اسپیڈ ڈیزل کی قیمت میں 2 روپے 24 پیسے فی لیٹر اضافہ کیا گیا ہے، جس کے بعد ڈیزل 390 روپے 62 پیسے فی لیٹر میں دستیاب ہوگا۔

نوٹیفکیشن کے مطابق مٹی کے تیل کی قیمت میں بھی ایک روپے 4 پیسے فی لیٹر اضافہ کیا گیا ہے۔ نئی قیمت 304 روپے 67 پیسے فی لیٹر مقرر کی گئی ہے، جبکہ اس سے قبل یہ 303 روپے 63 پیسے فی لیٹر تھی۔

پیٹرولیم ڈویژن نے واضح کیا ہے کہ نئی قیمتوں کا اطلاق 30 جولائی کے لیے ہوگا۔

حکومت نے حالیہ علاقائی صورتحال کے باعث پیٹرولیم مصنوعات کی قیمتوں کا تعین روزانہ کی بنیاد پر کرنے کا فیصلہ کیا ہے۔ نئی پالیسی کے تحت اوگرا وزیراعظم یا وفاقی حکومت کی منظوری کے بغیر قیمتوں کا اعلان کرے گا، جبکہ ہفتہ اور اتوار کو آخری اعلان کردہ نرخ برقرار رہیں گے۔

واضح رہے کہ اس سے ایک روز قبل، یعنی 29 جولائی کے لیے پیٹرول کی قیمت میں ایک روپیہ 63 پیسے جبکہ ڈیزل کی قیمت میں ایک روپیہ 55 پیسے فی لیٹر اضافہ کیا گیا تھا۔