ویب ڈیسک:پاکستان کی ڈیجیٹل معیشت نے ایک اور اہم سنگ میل عبور کر لیا، جہاں ملکی فری لانسرز نے مالی سال 2025-26 کے دوران ریکارڈ 1 ارب 76 کروڑ ڈالر کا زرمبادلہ کما کر نئی تاریخ رقم کر دی۔

سرکاری اعداد و شمار کے مطابق گزشتہ مالی سال کے دوران پاکستانی فری لانسرز کی برآمدی آمدن میں 78 فیصد کا نمایاں اضافہ ریکارڈ کیا گیا، جو ملک میں فری لانسنگ کے شعبے کی تیز رفتار ترقی کی عکاسی کرتا ہے۔

اعداد و شمار کے مطابق صرف جون 2026 میں پاکستانی فری لانسرز نے 16 کروڑ 40 لاکھ ڈالر کی برآمدی آمدن حاصل کی، جو جون 2025 کے مقابلے میں 69 فیصد زیادہ ہے۔

سرکاری ڈیٹا کے مطابق مالی سال 2024-25 میں پاکستانی فری لانسرز کی برآمدی آمدن 98 کروڑ 50 لاکھ ڈالر رہی تھی، جبکہ مالی سال 2023-24 میں یہ 50 کروڑ 50 لاکھ ڈالر ریکارڈ کی گئی۔ اسی طرح مالی سال 2022-23 میں فری لانسرز نے 36 کروڑ 40 لاکھ ڈالر کا زرمبادلہ ملک کے لیے کمایا تھا۔

ماہرین کے مطابق فری لانسنگ کے شعبے میں مسلسل اضافہ اس بات کا ثبوت ہے کہ پاکستانی نوجوان عالمی ڈیجیٹل مارکیٹ میں اپنی صلاحیتوں کا بھرپور مظاہرہ کر رہے ہیں۔ ان کا کہنا ہے کہ اگر اس شعبے کو مزید سہولیات، تربیت اور جدید ڈیجیٹل انفراسٹرکچر فراہم کیا جائے تو مستقبل میں فری لانسرز کی برآمدی آمدن میں مزید نمایاں اضافہ ممکن ہے، جس سے ملکی معیشت اور زرمبادلہ کے ذخائر کو بھی تقویت ملے گی۔