اسلام آباد: پاکستان اور امریکا کے درمیان مالی سال 2025-26 کے دوران تجارتی تعلقات میں پاکستان کو نمایاں فائدہ حاصل ہوا ہے، جس کے نتیجے میں امریکا کے ساتھ ملک کا تجارتی سرپلس 2 ارب 59 کروڑ ڈالر تک پہنچ گیا۔

حکومتی ذرائع کے مطابق مالی سال 2025-26 کے دوران پاکستان نے امریکا کو مجموعی طور پر 5 ارب 91 کروڑ ڈالر مالیت کی اشیا برآمد کیں، جبکہ اسی عرصے میں امریکا سے پاکستان کی درآمدات 3 ارب 32 کروڑ ڈالر رہیں۔ اس طرح دونوں ممالک کے درمیان مجموعی تجارتی توازن پاکستان کے حق میں رہا۔

ذرائع کا کہنا ہے کہ امریکا پاکستان کے لیے سب سے بڑی برآمدی منڈی ہے، جہاں پاکستانی مصنوعات کی طلب ملک کے برآمدی شعبے کے لیے اہم کردار ادا کرتی ہے۔ تجارتی اعداد و شمار سے ظاہر ہوتا ہے کہ پاکستان گزشتہ کئی برسوں سے امریکا کے ساتھ تجارتی سرپلس برقرار رکھنے میں کامیاب رہا ہے۔

حکومتی اعداد و شمار کے مطابق گزشتہ پانچ برسوں کے دوران امریکا کے ساتھ پاکستان کا مجموعی تجارتی سرپلس 17 ارب ڈالر سے تجاوز کر گیا۔ اس عرصے میں پاکستان کی امریکا کے لیے مجموعی برآمدات 29 ارب 15 کروڑ ڈالر رہیں، جبکہ امریکا سے پاکستان کی مجموعی درآمدات 12 ارب 12 کروڑ ڈالر ریکارڈ کی گئیں۔

تجارتی ماہرین کے مطابق امریکا کے ساتھ مسلسل تجارتی سرپلس پاکستان کے لیے اہم معاشی فائدہ ہے، کیونکہ امریکا پاکستانی مصنوعات کے لیے سب سے بڑی برآمدی منڈیوں میں شامل ہے۔ برآمدات میں اضافہ ملک کے زرمبادلہ کے ذخائر کو بہتر بنانے اور بیرونی ادائیگیوں کے دباؤ کو کم کرنے میں بھی مددگار ثابت ہو سکتا ہے۔