اسلام آباد: پاکستان نے سعودی عرب اور ترکیے کے ساتھ مکہ مشترکہ دفاعی معاہدے کو مزید وسعت دینے کا عندیہ دے دیا ہے۔ ترجمان دفتر خارجہ طاہر اندرابی نے کہا ہے کہ مکہ معاہدہ امن و سلامتی کے حوالے سے صرف تین ممالک تک محدود نہیں بلکہ اس کا دائرہ مستقبل میں وسیع کیا جاسکتا ہے۔

ترجمان دفتر خارجہ کے مطابق مکہ معاہدے کا مقصد خطے اور اس سے باہر اجتماعی سلامتی کو یقینی بنانے کے لیے مشترکہ کوششیں کرنا ہے۔ انہوں نے کہا کہ مشترکہ دفاعی معاہدہ کھلا ہے، تاہم اس بارے میں فی الحال علم نہیں کہ مستقبل میں کون سے ممالک اس کا حصہ بن سکتے ہیں۔

طاہر اندرابی نے کہا کہ معاہدہ دفاعی نوعیت کا ہے اور اس کا بنیادی مقصد امن و سلامتی کا فروغ ہے۔ انہوں نے واضح کیا کہ مکہ معاہدے کے تحت ایک ملک پر ہونے والے حملے کو تمام فریقوں پر حملہ تصور کیا جائے گا۔

ترجمان دفتر خارجہ نے مزید کہا کہ پاکستان سعودی عرب کی قیادت میں قائم بحری اتحاد کے معاہدے کو عملی شکل دینے کے لیے بھی تیار ہے۔ ان کے مطابق پاکستان خطے میں امن، استحکام اور اجتماعی سلامتی کے لیے اپنے شراکت دار ممالک کے ساتھ تعاون جاری رکھے گا۔

پاکستان کی جانب سے مکہ مشترکہ دفاعی معاہدے کو دیگر ممالک کے لیے کھلا قرار دینا خطے میں دفاعی اور سلامتی کے تعاون کے دائرہ کار میں ممکنہ توسیع کی جانب اہم اشارہ قرار دیا جا رہا ہے۔