زیورخ: وزیر مملکت اور پاکستان ورچوئل ایسیٹس ریگولیٹری اتھارٹی (PVARA) کے چیئرمین بلال بن ثاقب نے کہا ہے کہ پاکستان عالمی کرپٹو اپنانے کی درجہ بندی میں تیسرے نمبر پر پہنچ گیا ہے اور اب ڈیجیٹل اثاثوں کے عالمی مستقبل کی تشکیل میں بھی فعال کردار ادا کرے گا۔

زیورخ میں منعقدہ عالمی فورم سے خطاب کرتے ہوئے بلال بن ثاقب نے کہا کہ دنیا کے مالیاتی نظام اور قواعد تیزی سے تبدیل ہو رہے ہیں، ایسے میں پاکستان صرف ان تبدیلیوں کا حصہ نہیں بنے گا بلکہ ٹوکنائزڈ فنانس کے لیے نئے قواعد کی تشکیل میں بھی اپنا کردار ادا کرے گا۔

انہوں نے کہا کہ اب سوال صرف ڈیجیٹل اثاثوں کی اجازت دینے کا نہیں بلکہ ان کی مؤثر ریگولیشن اور عالمی سطح پر قیادت کا ہے۔ ان کے مطابق ابھرتی ہوئی معیشتوں کو اپنے مالیاتی مستقبل کے قواعد خود وضع کرنا ہوں گے۔

بلال بن ثاقب کا کہنا تھا کہ پاکستان "پاکستان فرسٹ" حکمت عملی کے تحت معاشی جدت کو فروغ دے رہا ہے۔ حکومت کا مقصد نئی ٹیکنالوجی کو روکنا نہیں بلکہ مؤثر ضابطوں کے ذریعے اسے محفوظ اور پائیدار بنانا ہے۔

انہوں نے کہا کہ پاکستان پہلے ہی دنیا کی نمایاں ڈیجیٹل اثاثہ مارکیٹوں میں شامل ہو چکا ہے اور عالمی کرپٹو اپنانے کی درجہ بندی میں تیسری پوزیشن حاصل کر چکا ہے۔

اپنے خطاب میں انہوں نے اسٹیبل کوائنز اور ٹوکنائزڈ منی کے حوالے سے بھی پاکستان کا مؤقف پیش کرتے ہوئے کہا کہ ملک نے پہلے ڈیجیٹل اثاثوں کو اپنایا اور اب ان کے لیے جامع ریگولیٹری فریم ورک تشکیل دیا جا رہا ہے تاکہ عالمی مالیاتی نظام میں مؤثر کردار ادا کیا جا سکے۔