ویب ڈیسک: پاکستان اور قطر نے امریکا اور ایران کے درمیان جاری کشیدگی کم کرنے اور تعطل کا شکار مذاکرات دوبارہ شروع کرانے کے لیے اپنی سفارتی سرگرمیاں تیز کر دی ہیں۔ عرب میڈیا کی ایک رپورٹ کے مطابق دونوں ممالک نے ثالثی کی ایک مشترکہ تجویز امریکا اور ایران کے سامنے رکھی، جس پر دونوں جانب سے ابتدائی ردعمل موصول ہو گیا ہے۔

رپورٹ میں بتایا گیا ہے کہ امریکا اور ایران نے پاکستان اور قطر کو اپنے اپنے مؤقف سے آگاہ کر دیا ہے، جبکہ ایران نے پاکستان کو یہ بھی یقین دہانی کرائی ہے کہ وہ مذاکراتی عمل کو آگے بڑھانے کے لیے تیار ہے۔ ذرائع کے مطابق تہران چاہتا ہے کہ مجوزہ مذاکرات تین الگ مراحل میں کیے جائیں تاکہ اہم معاملات کو مرحلہ وار حل کیا جا سکے۔

ذرائع کے مطابق ایران کی تجویز کے تحت پہلے مرحلے میں آبنائے ہرمز سے متعلق امور پر بات چیت ہوگی، دوسرے مرحلے میں ایران کے بیرون ملک منجمد اثاثوں کا معاملہ زیر غور آئے گا، جبکہ تیسرے اور آخری مرحلے میں ایرانی جوہری پروگرام پر مذاکرات کیے جائیں گے۔

رپورٹ میں مزید کہا گیا ہے کہ ایران نے پاکستان کو یہ بھی آگاہ کیا ہے کہ وہ آبنائے ہرمز کے متبادل کسی نئی تجارتی یا بحری راہداری کی تجویز کو قبول کرنے پر آمادہ نہیں اور اسے مسترد کرتا ہے۔

عرب میڈیا کے مطابق اگر مذاکرات کی راہ ہموار ہوئی تو آئندہ دور جنیوا، دوحہ یا اسلام آباد میں سے کسی ایک مقام پر منعقد ہو سکتا ہے، تاہم میزبان شہر کے بارے میں ابھی تک کوئی حتمی فیصلہ نہیں کیا گیا۔

دوسری جانب ایک سینئر ایرانی عہدیدار نے خبردار کیا ہے کہ امریکی حملوں میں وقفہ غیر یقینی صورتحال کو مزید بڑھا رہا ہے۔ ان کا کہنا تھا کہ ایران کشیدگی میں کمی اور حملے روکنے کے لیے تیار ہے، اور اگر امریکا مزید فوجی کارروائی نہیں کرتا تو ایران بھی کسی قسم کی جوابی کارروائی سے گریز کرے گا۔

تاہم اب تک امریکا اور ایران کی جانب سے عرب میڈیا میں سامنے آنے والی ان اطلاعات کی باضابطہ تصدیق یا تردید نہیں کی گئی، جس کے باعث ممکنہ مذاکرات اور سفارتی پیش رفت کے بارے میں حتمی صورتحال ابھی واضح نہیں ہو سکی۔