اسلام آباد:پاک بحریہ کے سربراہ ایڈمرل نوید اشرف سے بیلاروس کے چیف آف جنرل اسٹاف اور اول نائب وزیر دفاع میجر جنرل پاویل موراویکو کی قیادت میں ایک اعلیٰ سطحی وفد نے نیول ہیڈ کوارٹرز اسلام آباد میں ملاقات کی، جس میں دوطرفہ دفاعی تعاون اور باہمی دلچسپی کے مختلف پیشہ ورانہ امور پر تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق چیف آف دی نیول اسٹاف ایڈمرل نوید اشرف نے معزز مہمان اور ان کے وفد کا نیول ہیڈ کوارٹرز آمد پر خیرمقدم کیا۔ ملاقات کے دوران پاکستان اور بیلاروس کے درمیان دفاعی روابط، عسکری تعاون اور دیگر پیشہ ورانہ معاملات پر تفصیلی گفتگو ہوئی۔

آئی ایس پی آر کے مطابق ایڈمرل نوید اشرف نے اس موقع پر کہا کہ پاکستان بیلاروس کے ساتھ اپنے دوستانہ تعلقات کو انتہائی اہمیت دیتا ہے اور دونوں ممالک کے درمیان طویل المدتی، مؤثر اور کثیرالجہتی تعاون کو مزید فروغ دینے کا خواہاں ہے۔ انہوں نے اس بات پر زور دیا کہ مشترکہ تعاون سے دونوں ممالک کے دفاعی تعلقات مزید مستحکم ہو سکتے ہیں۔

بیان کے مطابق بیلاروسی وفد کے سربراہ میجر جنرل پاویل موراویکو نے علاقائی سمندری سلامتی کے فروغ کے لیے پاک بحریہ کے کردار اور پیشہ ورانہ صلاحیتوں کو سراہا۔ انہوں نے سمندری تحفظ کے لیے پاکستان کی کاوشوں اور عزم کی بھی تعریف کی۔

آئی ایس پی آر کا کہنا ہے کہ ملاقات میں دونوں فریقوں نے موجودہ دوطرفہ دفاعی تعلقات کے دائرہ کار کو مزید وسعت دینے، انہیں مضبوط بنانے اور مختلف شعبوں میں تعاون بڑھانے کے عزم کا اعادہ کیا۔ اس موقع پر دونوں ممالک کے درمیان دفاعی شعبے میں مستقبل کے روابط اور تعاون کو مزید مؤثر بنانے پر بھی اتفاق کیا گیا۔

پاکستان اور بیلاروس کے درمیان حالیہ برسوں میں دفاعی اور عسکری تعاون میں بتدریج اضافہ دیکھنے میں آیا ہے، جبکہ دونوں ممالک مختلف شعبوں میں باہمی روابط کو مزید مستحکم بنانے کے لیے بھی سرگرم ہیں۔