ویب ڈیسک: برطانوی اخبار دی ٹیلی گراف نے پاکستان کو دنیا کے ان منفرد سیاحتی مقامات میں شامل کیا ہے جہاں برف پوش پہاڑ، پُرسکون وادیاں، قدیم تہذیب اور مہم جوئی سیاحوں کو ایک منفرد تجربہ فراہم کرتے ہیں۔

تفصیلات کے مطابق اخبار میں شائع ہونے والے خصوصی سفری مضمون میں معروف ٹریول رائٹرز بینیڈکٹ ایلن اور سارہ مارشل نے پاکستان کے مختلف سیاحتی مقامات کا ذکر کرتے ہوئے اپنے قارئین کو ملک کی خوبصورتی سے روشناس کرایا ہے۔ مضمون میں خاص طور پر شمالی پاکستان کے دلکش مناظر کو نمایاں کیا گیا ہے، جہاں قراقرم کے برف پوش پہاڑوں کی کئی چوٹیاں 25 ہزار فٹ سے بھی زیادہ بلند ہیں۔

خصوصی مضمون میں پاکستان کو حقیقی معنوں میں بلند و بالا پہاڑوں کی سرزمین قرار دیتے ہوئے وادی ہنزہ، بلند گلیشیئرز، جنگلی پھولوں سے بھرے میدانوں اور شاہراہ قراقرم کا خصوصی ذکر کیا گیا ہے۔ اخبار نے شاہراہ قراقرم کو انجینئرنگ کا شاندار کارنامہ قرار دیا ہے، جو پاکستان کو چین سے ملاتی ہے اور قراقرم، ہمالیہ اور ہندوکش کے عظیم پہاڑی سلسلوں سے گزرتی ہے۔

مضمون میں دور دراز پہاڑی علاقوں میں آباد لوگوں کی سادگی، گرمجوشی اور مہمان نوازی کو بھی اجاگر کیا گیا ہے۔ مصنفین کے مطابق پاکستان آنے والے سیاح قدرتی مناظر سے لطف اندوز ہونے کے ساتھ ساتھ مقامی لوگوں کی زندگی، روایات اور ثقافت کو بھی قریب سے جان سکتے ہیں۔

رپورٹ میں قدیم شاہراہ ریشم، لاہور کی 17ویں صدی میں تعمیر ہونے والی بادشاہی مسجد اور ہزاروں سال قدیم وادی سندھ کی تہذیب کا بھی خصوصی ذکر کیا گیا ہے۔ اخبار نے پاکستان کے علاوہ ترکمانستان، گیبون، انگولا، تیمور لیستے، نکاراگوا، گیانا، آرمینیا، جمہوریہ کانگو اور انڈونیشیا کے ویسٹ پاپوا اور پاپوا کے علاقوں کو بھی اپنی فہرست میں شامل کیا ہے۔

یاد رہے کہ دی ٹیلی گراف اس سے قبل 2024 میں بھی اپنی ایک سیاحتی فیچر رپورٹ میں پاکستان کو شامل کرچکا ہے، جس سے ملک کے سیاحتی مقامات میں عالمی دلچسپی کا اندازہ ہوتا ہے۔