اسلام آباد:وفاقی حکومت نے ملک میں ڈیجیٹل معیشت کے فروغ اور نوجوانوں کو جدید تقاضوں سے ہم آہنگ بنانے کے لیے ملک بھر میں جدید آئی ٹی کورسز شروع کرنے کا فیصلہ کر لیا ہے۔ اس سلسلے میں وفاقی وزیر برائے انفارمیشن ٹیکنالوجی شزہ فاطمہ خواجہ نے متعلقہ اداروں کو فوری طور پر عالمی معیار کے تربیتی پروگرامز شروع کرنے کی ہدایت جاری کر دی ہے۔

تفصیلات کے مطابق وفاقی وزیر شزہ فاطمہ خواجہ کی زیر صدارت آئی ٹی تربیتی اداروں کے سربراہان کا ایک اہم اجلاس منعقد ہوا، جس میں نوجوانوں کو جدید ڈیجیٹل مہارتیں فراہم کرنے، آئی ٹی افرادی قوت کی تیاری تیز کرنے اور پاکستان کی ڈیجیٹل معیشت کو مضبوط بنانے کے لیے جامع حکمت عملی پر غور کیا گیا۔

اجلاس میں اس بات پر اتفاق کیا گیا کہ نوجوانوں کو عالمی مارکیٹ کی ضروریات کے مطابق تربیت دی جائے تاکہ وہ فری لانسنگ، ریموٹ ورک اور بین الاقوامی آئی ٹی شعبے میں بہتر روزگار کے مواقع حاصل کر سکیں۔ اس مقصد کے لیے ملک بھر میں جدید آئی ٹی کورسز اور عالمی معیار کے تربیتی پروگرامز جلد از جلد شروع کیے جائیں گے۔

وفاقی وزیر نے اجلاس سے خطاب کرتے ہوئے کہا کہ حکومت کی اولین ترجیح نوجوانوں کو ایسی ڈیجیٹل مہارتوں سے آراستہ کرنا ہے جو انہیں عالمی منڈی میں مؤثر انداز میں مقابلہ کرنے کے قابل بنائیں۔ انہوں نے کہا کہ ڈیجیٹل معیشت کے فروغ کے لیے ہنر مند افرادی قوت کی تیاری ناگزیر ہے اور حکومت اس مقصد کے لیے تمام دستیاب وسائل بروئے کار لا رہی ہے۔

شزہ فاطمہ خواجہ نے تمام آئی ٹی تربیتی اداروں کو ہدایت کی کہ وہ اپنے پروگراموں کی پیش رفت اور کارکردگی سے متعلق ہفتہ وار رپورٹ وزارتِ انفارمیشن ٹیکنالوجی کو باقاعدگی سے پیش کریں، تاکہ تربیتی عمل کی مسلسل نگرانی اور بہتری کو یقینی بنایا جا سکے۔ حکومت کو امید ہے کہ اس اقدام سے نہ صرف نوجوانوں کے لیے روزگار کے نئے مواقع پیدا ہوں گے بلکہ پاکستان کی ڈیجیٹل معیشت کو بھی نمایاں تقویت ملے گی۔