اسلام آباد:پاکستان نے کویت کی جانب سے جون 2023 میں طے پانے والے دفاعی تعاون کے معاہدے کی توثیق کا خیرمقدم کرتے ہوئے اسے دونوں برادر ممالک کے درمیان دفاعی شراکت داری کو مزید مستحکم بنانے کی جانب ایک اہم پیش رفت قرار دیا ہے۔

دفتر خارجہ کے ترجمان طاہر اندرابی نے میڈیا کے سوالات کے جواب میں کہا کہ یہ معاہدہ پاکستان اور کویت کے درمیان 1980 کی دہائی سے قائم دیرینہ دفاعی تعلقات میں ایک نئے سنگ میل کی حیثیت رکھتا ہے۔ ان کے مطابق معاہدے کی توثیق اس بات کا واضح اظہار ہے کہ دونوں ممالک دفاعی تعاون کو مزید وسعت دینے اور اپنی سکیورٹی شراکت داری کو نئی بلندیوں تک لے جانے کے لیے پرعزم ہیں۔

ترجمان نے بتایا کہ حالیہ مہینوں کے دوران دونوں ممالک کے سول اور عسکری حکام کے درمیان ہونے والے اعلیٰ سطحی رابطوں کے نتیجے میں اس معاہدے کی توثیق ممکن ہوئی، جس کا بنیادی مقصد دفاعی شعبے میں تعاون کو مزید مضبوط اور منظم بنانا ہے۔

طاہر اندرابی کے مطابق یہ معاہدہ دفاعی تعاون کے فروغ کے لیے ایک جامع ادارہ جاتی فریم ورک فراہم کرتا ہے۔ اس کے تحت فوجی تربیت اور تعلیم، مشترکہ عسکری مشقوں، پیشہ ورانہ مہارتوں کے تبادلے اور باہمی اتفاق سے طے پانے والے دیگر شعبوں میں تعاون کو فروغ دیا جائے گا۔ انہوں نے کہا کہ اس معاہدے سے دونوں ممالک کی مسلح افواج کے درمیان ادارہ جاتی روابط مزید مستحکم ہوں گے اور باہمی اعتماد پر مبنی دیرینہ دفاعی تعلقات کو نئی تقویت ملے گی۔

ترجمان دفتر خارجہ نے مزید کہا کہ پاکستان اور کویت معاہدے کی شقوں کے مطابق اس پر مؤثر عمل درآمد کے لیے قریبی تعاون جاری رکھیں گے۔ ان کے بقول اس تعاون سے نہ صرف دونوں ممالک کی دفاعی شراکت داری مزید مضبوط ہوگی بلکہ علاقائی امن، سلامتی اور استحکام کے فروغ میں بھی مثبت کردار ادا کیا جا سکے گا۔

واضح رہے کہ پاکستان اور کویت کے درمیان دفاعی تعاون کا یہ معاہدہ 11 جون 2023 کو طے پایا تھا۔ اس میں دفاعی پیداوار، برقی مواصلاتی نظام، سائنسی تحقیق، عسکری ذرائع ابلاغ، ثقافتی سرگرمیوں اور کھیلوں کے شعبوں میں تعاون سمیت متعدد اہم پہلو شامل ہیں، جن کا مقصد دونوں ممالک کے درمیان دفاعی روابط کو مزید وسعت دینا ہے۔