اسلام آباد:پاکستان اور کویت کے درمیان دفاعی تعاون مزید مضبوط بنانے کے لیے ’’پروٹوکول معاہدہ 2026‘‘ پر دستخط کر دیے گئے۔

تفصیلات کے مطابق کویتی وزیر دفاع کی قیادت میں اعلیٰ سطحی وفد نے وزارتِ دفاع کا دورہ کیا۔ وفد میں کویت فوج کے چیف آف جنرل اسٹاف لیفٹیننٹ جنرل خالد درج سعد الشریعان بھی شامل تھے۔

کویتی وفد نے وزارتِ دفاع راولپنڈی میں وزیر دفاع خواجہ آصف سے ملاقات کی، جس میں باہمی دلچسپی کے امور، سیکیورٹی تعاون اور دفاعی روابط کو مزید مضبوط بنانے پر تبادلہ خیال کیا گیا۔

وزارتِ دفاع کے مطابق نیا دفاعی تعاون معاہدہ 2023 میں قائم کیے گئے فوجی تعاون کے موجودہ فریم ورک کو مزید وسعت دے گا۔ معاہدے کے تحت پاک فوج کویتی افواج کو مختلف شعبوں میں معاونت فراہم کرے گی۔

ان شعبوں میں فوجی تربیت، استعدادِ کار میں اضافہ، سرحدی انتظام اور دفاعی تعاون کے دیگر باہمی طور پر طے شدہ شعبے شامل ہیں۔

وزارتِ دفاع کا کہنا ہے کہ یہ معاہدہ پاکستان اور کویت کے درمیان دیرینہ دفاعی تعلقات، باہمی اعتماد، احترام اور مشترکہ تزویراتی مفادات کی عکاسی کرتا ہے۔ معاہدے سے دونوں ممالک کی مسلح افواج کے درمیان تعاون اور پیشہ ورانہ روابط کو مزید فروغ ملنے کی توقع ہے۔