پاکستان سمیت آٹھ اسلامی ممالک نے غزہ کی موجودہ صورتحال پر شدید تشویش کا اظہار کرتے ہوئے صیہونی ریاست کی جاری کارروائیوں اور مبینہ بین الاقوامی قانون کی خلاف ورزیوں کی مشترکہ طور پر مذمت کی ہے۔ اس حوالے سے پاکستان، مصر، ترکیہ، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ نے ایک مشترکہ اعلامیہ جاری کیا۔

اعلامیے میں کہا گیا ہے کہ غزہ میں جاری فوجی کارروائیاں اور مبینہ خلاف ورزیاں بین الاقوامی قانون کے تحت عائد ذمہ داریوں سے متصادم ہیں اور غزہ تنازع کے خاتمے کے لیے پیش کیے گئے جامع امن منصوبے کی روح کے بھی خلاف ہیں۔ وزرائے خارجہ نے خبردار کیا کہ یہ صورتحال خطے میں امن کے لیے جاری علاقائی اور عالمی سفارتی کوششوں کو نقصان پہنچا سکتی ہے۔

مشترکہ اعلامیے کے مطابق امریکی صدر ڈونلڈ ٹرمپ کے اعلان کے بعد فلسطینی دھڑوں نے مجوزہ روڈ میپ کو قبول کر لیا تھا، تاہم حالیہ پیش رفت سیاسی عمل کو سبوتاژ کرنے، کشیدگی میں مزید اضافے اور غزہ میں پہلے سے سنگین انسانی بحران کو مزید گہرا کرنے کا باعث بن سکتی ہے۔

وزرائے خارجہ نے خواتین اور بچوں سمیت شہریوں کی ہلاکتوں پر گہری تشویش کا اظہار کرتے ہوئے کہا کہ عام شہریوں کو نشانہ بنانا بین الاقوامی انسانی قوانین کی سنگین خلاف ورزی ہے۔ انہوں نے مطالبہ کیا کہ غزہ میں فوری، محفوظ اور بلا رکاوٹ انسانی امداد کی فراہمی یقینی بنائی جائے، جبکہ اسپتالوں، طبی مراکز، طبی عملے اور امدادی کارکنوں کو ہر صورت تحفظ فراہم کیا جائے۔

اعلامیے میں اقوام متحدہ کی سلامتی کونسل پر زور دیا گیا کہ وہ صیہونی ریاست کو بین الاقوامی قانون کی پاسداری کا پابند بنانے کے لیے مؤثر اقدامات کرے اور مبینہ سنگین خلاف ورزیوں پر جوابدہی کو یقینی بنائے۔

آٹھ اسلامی ممالک نے اپنے مشترکہ مؤقف کا اعادہ کرتے ہوئے مقبوضہ فلسطینی علاقوں کے انضمام یا فلسطینی شہریوں کی جبری بے دخلی کی ہر کوشش کو مسترد کیا۔ اعلامیے میں کہا گیا کہ خطے میں دیرپا اور منصفانہ امن کا واحد قابلِ عمل حل 1967 کی سرحدوں کی بنیاد پر ایک آزاد فلسطینی ریاست کا قیام ہے، جس کا دارالحکومت مشرقی یروشلم ہو۔