اسلام آباد:پاکستان نے سعودی عرب پر ہونے والے حملے کی شدید مذمت کرتے ہوئے واضح کیا ہے کہ ریاض کو اقوام متحدہ کے چارٹر کے تحت اپنے دفاع کا مکمل حق حاصل ہے۔ دفتر خارجہ کا کہنا ہے کہ پاکستان خطے میں کشیدگی کے خاتمے اور سفارتی حل کی حمایت جاری رکھے گا۔

ہفتہ وار میڈیا بریفنگ کے دوران ترجمان دفتر خارجہ طاہر اندرابی نے کہا کہ پاکستان سعودی عرب کی خودمختاری اور علاقائی سالمیت کی مکمل حمایت کرتا ہے۔ انہوں نے کہا کہ اقوام متحدہ کے چارٹر کے آرٹیکل 51 کے تحت ہر ملک کو اپنے دفاع کا حق حاصل ہے، اسی تناظر میں سعودی عرب کی دفاعی کارروائی کو دیکھا جانا چاہیے۔

ترجمان نے کہا کہ پاکستان نے امریکا اور ایران پر زور دیا ہے کہ وہ اسلام آباد مفاہمتی یادداشت پر عمل درآمد کو یقینی بنائیں۔ ان کے مطابق پاکستان دونوں ممالک کے درمیان کشیدگی کم کرنے اور انہیں مذاکرات کی میز پر لانے کے لیے اپنی سفارتی کوششیں جاری رکھے ہوئے ہے۔

طاہر اندرابی نے میڈیا بریفنگ میں پاکستان اور کویت کے درمیان دفاعی تعاون کے معاہدے کی توثیق کا بھی خیر مقدم کیا۔ انہوں نے کہا کہ پاکستان کے اردن اور بحرین کے ساتھ بھی مضبوط دفاعی تعاون موجود ہے، جبکہ ضرورت پڑنے پر ان ممالک کے ساتھ نئے دفاعی تعاون کے معاہدوں سے بھی آگاہ کیا جائے گا۔

ترجمان نے اس عزم کا اعادہ کیا کہ پاکستان خطے میں امن، استحکام اور تنازعات کے پرامن حل کے لیے سفارتی کوششوں کو جاری رکھے گا۔