اسلام آباد:پاکستان اور کینیڈا نے دوطرفہ تعلقات کو مزید مضبوط بنانے، تجارت اور سرمایہ کاری کے فروغ سمیت مختلف شعبوں میں تعاون بڑھانے کے عزم کا اظہار کرتے ہوئے مشترکہ اعلامیہ جاری کر دیا۔

دفتر خارجہ کے ترجمان کے مطابق نائب وزیراعظم و وزیر خارجہ اسحاق ڈار اور کینیڈا کی وزیر خارجہ کے درمیان ہونے والی ملاقات میں تجارت، سرمایہ کاری اور عوامی روابط کو وسعت دینے پر اتفاق کیا گیا۔ دونوں رہنماؤں نے اقتصادی تعاون کو مزید مستحکم بنانے کے لیے مختلف اقدامات پر بھی تبادلہ خیال کیا۔

اعلامیے کے مطابق کینیڈا نے اسلام آباد مفاہمتی یادداشت تک پہنچنے میں پاکستان کے ثالثی کردار کو سراہا اور دونوں ممالک نے اس مفاہمتی یادداشت پر عمل درآمد کے ساتھ پائیدار جنگ بندی کی حمایت کے عزم کا اعادہ کیا۔

دونوں ممالک نے پاکستان-کینیڈا فارن انویسٹمنٹ پروٹیکشن اینڈ پروموشن معاہدے پر جاری مذاکرات جلد مکمل کرنے کی ضرورت پر زور دیا، جبکہ مشترکہ ورکنگ گروپ برائے تجارت و سرمایہ کاری کو دوبارہ فعال کرنے پر بھی اتفاق کیا گیا۔

ترجمان کے مطابق پاکستان اور کینیڈا نے صاف توانائی، کان کنی، بنیادی ڈھانچے، زراعت، نئی ٹیکنالوجی اور ماحولیاتی تحفظ کے شعبوں میں تعاون بڑھانے پر بھی اتفاق کیا۔

اعلامیے میں کہا گیا کہ کینیڈین کمپنی کے 240 میگاواٹ دھابیجی ہائبرڈ ونڈ سولر منصوبے کو پاکستان میں اہم سرمایہ کاری قرار دیا گیا، جبکہ زرعی شعبے میں کینولا، دالوں، سویا بین، چاول، مصالحہ جات اور پھلوں کی دوطرفہ تجارت کو فروغ دینے پر بھی اتفاق ہوا۔

اس کے علاوہ کینیڈین کینولا کی درآمد کے لیے نئے فائٹو سینیٹری پروٹوکول پر دستخط کیے گئے، جبکہ معدنیات کے شعبے میں تجارت اور سرمایہ کاری بڑھانے کے عزم کا بھی اظہار کیا گیا۔

دفتر خارجہ کے مطابق کینیڈا نے پاکستان کی انسداد دہشت گردی کی کوششوں میں اقوام متحدہ اور انٹرپول کے ذریعے تعاون جاری رکھنے کا اعلان بھی کیا۔