اسلام آباد: پاکستان سمیت 8 ممالک نے مقبوضہ فلسطینی علاقوں میں قائم غیر قانونی صہیونی بستیوں کے خلاف برطانیہ کی جانب سے عائد پابندیوں کا خیرمقدم کیا ہے۔

ترجمان دفتر خارجہ کے مطابق پاکستان، ترکیہ، مصر، انڈونیشیا، اردن، قطر، سعودی عرب اور متحدہ عرب امارات نے مشترکہ بیان میں غیر قانونی صہیونی بستیوں سے درآمدات پر برطانوی پابندیوں کا خیرمقدم کیا۔

مشترکہ اعلامیے میں صہیونی غیر قانونی بستیوں سے منسلک خدمات پر برطانوی پابندیوں کا بھی خیرمقدم کرتے ہوئے عالمی برادری سے مطالبہ کیا گیا کہ وہ غیر قانونی بستیوں کے خلاف اسی نوعیت کے اقدامات کرے۔

آٹھوں ممالک نے مطالبہ کیا کہ غیر قانونی بستیوں میں سرگرم تنظیموں اور افراد کا احتساب کیا جائے اور ان بستیوں سے تجارت روکنے کے لیے عالمی برادری ٹھوس اقدامات کرے۔

بیان کے مطابق صہیونی آبادکاری کی سرگرمیاں بین الاقوامی قانون اور اقوام متحدہ کی قراردادوں کی خلاف ورزی ہیں۔ سلامتی کونسل کی قرارداد 2334 اور عالمی عدالت انصاف کی رائے بھی صہیونی قبضے کو غیر قانونی قرار دیتی ہے۔

مشترکہ بیان میں مطالبہ کیا گیا کہ صہیونی ریاست مقبوضہ فلسطینی علاقوں کی جغرافیائی اور آبادیاتی حیثیت تبدیل کرنے کے اقدامات واپس لے۔

آٹھ ممالک نے کہا کہ غزہ مقبوضہ فلسطینی علاقے کا لازمی حصہ ہے۔ انہوں نے غزہ تنازع کے خاتمے کے لیے صدر ٹرمپ کے جامع امن منصوبے پر مکمل اور فوری عملدرآمد، جبکہ غزہ میں سلامتی، استحکام، انسانی امداد اور تعمیر نو یقینی بنانے پر زور دیا۔

مشترکہ اعلامیے میں کہا گیا کہ دیرپا اور جامع امن کے لیے دو ریاستی حل ہی واحد قابلِ عمل راستہ ہے۔ اس مقصد کے لیے 4 جون 1967 کی سرحدوں پر آزاد، خودمختار اور قابلِ عمل فلسطینی ریاست قائم کی جائے، جس کا دارالحکومت مشرقی یروشلم ہو۔