اسلام آباد: غزہ کی صورتحال پر پاکستان سمیت 8 اسلامی ممالک کے وزرائے خارجہ نے مشترکہ مذمتی بیان جاری کرتے ہوئے خطے میں قیام امن کے لیے امریکی منصوبے پر فوری عملدرآمد کا مطالبہ کیا ہے۔

ترجمان دفتر خارجہ کے مطابق مشترکہ بیان میں غزہ سے متعلق امریکی امن منصوبے پر عملدرآمد مسترد کیے جانے کی مذمت کی گئی ہے۔ آٹھ اسلامی ممالک نے مؤقف اختیار کیا کہ امن منصوبے پر فوری عملدرآمد غزہ میں جنگ بندی اور خطے میں پائیدار امن کے قیام کے لیے ضروری ہے۔

دفتر خارجہ کے بیان کے مطابق مشترکہ اعلامیے میں کہا گیا ہے کہ غزہ میں امن کی راہ میں رکاوٹیں پیدا کرنے سے منصفانہ اور دیرپا امن کے حصول کے لیے کی جانے والی بین الاقوامی کوششوں کو نقصان پہنچ رہا ہے۔ اسلامی ممالک نے خبردار کیا کہ امن منصوبے پر عملدرآمد میں مزید تاخیر سے غزہ کی صورتحال مزید خراب ہوسکتی ہے۔

مشترکہ بیان میں اس بات کی نشاندہی بھی کی گئی کہ امریکی امن منصوبے کو فلسطینیوں کی جانب سے بھی قبول کیا گیا تھا، اس لیے اس پر عملی پیش رفت میں رکاوٹیں دور کرنا ضروری ہے۔

ترجمان دفتر خارجہ نے بتایا کہ امریکی امن منصوبے کا نقشۂ راہ مصر، قطر، ترکیہ، امریکا، غزہ کے نمائندوں اور امن بورڈ کی مشترکہ کوششوں کا نتیجہ ہے۔ آٹھ اسلامی ممالک نے اس منصوبے کو خطے میں امن کے قیام کی جانب ایک اہم پیش رفت قرار دیتے ہوئے اس پر فوری عملدرآمد پر زور دیا۔

اسلامی ممالک نے اپنے مشترکہ مؤقف میں غزہ میں امن، استحکام اور ایک منصفانہ و دیرپا حل کے لیے اجتماعی کوششیں جاری رکھنے کی ضرورت پر بھی زور دیا ہے۔