نیوز ڈیسک:امریکا اور ایران کے درمیان امن معاہدے کی خبروں اور آبنائے ہرمز میں بحری آمدورفت معمول پر آنے کی توقعات کے بعد عالمی منڈی میں خام تیل کی قیمتوں میں نمایاں کمی ریکارڈ کی گئی ہے۔

غیر ملکی میڈیا رپورٹس کے مطابق سرمایہ کاروں کے خدشات کم ہونے اور مشرق وسطیٰ میں کشیدگی میں کمی کے امکانات کے باعث عالمی توانائی مارکیٹس میں فروخت کا رجحان دیکھنے میں آیا، جس کے نتیجے میں خام تیل کی قیمتیں نیچے آگئیں۔

رپورٹس کے مطابق امریکی خام تیل (WTI) کی قیمت میں تقریباً 5 فیصد کمی ہوئی جس کے بعد یہ 80 ڈالر فی بیرل کی سطح تک آگیا۔ اسی طرح برطانوی خام تیل (Brent) بھی تقریباً 4 فیصد سستا ہو کر 83 ڈالر فی بیرل پر ٹریڈ ہونے لگا۔

متحدہ عرب امارات کے مربن کروڈ آئل کی قیمت میں بھی نمایاں کمی دیکھی گئی، جہاں تقریباً 5 فیصد کمی کے بعد قیمت 83 ڈالر فی بیرل تک پہنچ گئی۔

معاشی ماہرین کے مطابق اگر امریکا اور ایران کے درمیان طے پانے والا معاہدہ عملی شکل اختیار کرتا ہے اور خطے میں کشیدگی مزید کم ہوتی ہے تو عالمی منڈی میں تیل کی سپلائی سے متعلق خدشات کم ہو سکتے ہیں، جس سے قیمتوں پر مزید دباؤ پڑنے کا امکان ہے۔

واضح رہے کہ اس سے قبل وزیراعظم شہباز شریف اور امریکی صدر ڈونلڈ ٹرمپ نے امریکا اور ایران کے درمیان امن معاہدہ طے پانے کا اعلان کیا تھا، جس کی بعد ازاں ایرانی حکام نے بھی تصدیق کی۔