سیول: جنوبی کوریا نے انکشاف کیا ہے کہ شمالی کوریا کے پاس 80 سے 120 جوہری وار ہیڈز موجود ہوسکتے ہیں، جو امریکی صدر ڈونلڈ ٹرمپ کے حالیہ اندازے سے کہیں زیادہ تعداد ہے۔

عالمی خبر رساں ادارے کے مطابق جنوبی کوریا کے وزیر دفاع آن گیو بیک نے پارلیمانی دفاعی کمیٹی کے اجلاس کے دوران شمالی کوریا کے جوہری ذخیرے سے متعلق یہ تخمینہ پیش کیا۔

جنوبی کوریا کے وزیر دفاع نے بتایا کہ دستیاب معلومات اور مختلف تحقیقاتی جائزوں کی بنیاد پر شمالی کوریا کے جوہری ہتھیاروں کی تعداد عموماً 80 سے 120 کے درمیان سمجھی جاتی ہے۔ تاہم انہوں نے واضح کیا کہ شمالی کوریا کے جوہری ذخیرے کی درست تعداد کا تعین انتہائی مشکل ہے۔

آن گیو بیک کے مطابق 80 سے 120 وار ہیڈز کا تخمینہ کوئی حتمی یا باضابطہ طور پر تصدیق شدہ تعداد نہیں، بلکہ دستیاب شواہد، انٹیلی جنس معلومات اور مختلف مطالعات کی بنیاد پر لگایا گیا اندازہ ہے۔

انہوں نے مزید کہا کہ جنوبی کوریا کی فوج بھی شمالی کوریا کے جوہری ہتھیاروں کے حقیقی ذخیرے کی درست تعداد کی براہ راست تصدیق کرنے کی پوزیشن میں نہیں ہے۔

یہ بیان امریکی صدر ڈونلڈ ٹرمپ کے حالیہ دعوے کے بعد سامنے آیا ہے۔ دو روز قبل ٹرمپ نے کہا تھا کہ شمالی کوریا کے پاس 57 انتہائی طاقتور جوہری ہتھیار موجود ہیں۔ جنوبی کوریا کے تازہ تخمینے کے مطابق شمالی کوریا کے ممکنہ جوہری وار ہیڈز کی تعداد امریکی صدر کے بتائے گئے اعداد و شمار سے نمایاں طور پر زیادہ ہوسکتی ہے۔

شمالی کوریا طویل عرصے سے اپنے جوہری اور میزائل پروگرام کو خطے میں اپنی دفاعی حکمت عملی کا اہم حصہ قرار دیتا آیا ہے، جبکہ امریکا اور جنوبی کوریا اس پروگرام کو عالمی اور علاقائی سلامتی کے لیے بڑا خطرہ سمجھتے ہیں۔