تل ابیب: اسرائیلی وزیراعظم نیتن یاہو نے امریکی ثالثی میں لبنان کے ساتھ ہونے والے امن معاہدے کا خیرمقدم کرتے ہوئے اسے اسرائیل کی ایک تاریخی سفارتی کامیابی قرار دیا ہے۔

غیر ملکی میڈیا رپورٹس کے مطابق نیتن یاہو نے اپنے بیان میں کہا کہ یہ معاہدہ ایران اور حزب اللہ کے لیے ایک بڑا دھچکا ہے اور اس سے خطے میں اسرائیل کی سلامتی مزید مضبوط ہوگی۔

انہوں نے کہا کہ معاہدے کے تحت امریکا اور لبنان نے اسرائیل کے اس حق کو تسلیم کر لیا ہے کہ وہ اپنے شہریوں کو درپیش خطرات کے خاتمے تک لبنان میں سیکیورٹی زون برقرار رکھ سکتا ہے۔

نیتن یاہو کا کہنا تھا کہ اسرائیل اس سیکیورٹی زون کو اس وقت تک برقرار رکھے گا جب تک حزب اللہ اور دیگر مسلح گروہوں کو غیر مسلح نہیں کر دیا جاتا اور لبنان کی سرزمین سے اسرائیل کو لاحق تمام سیکیورٹی خطرات ختم نہیں ہو جاتے۔

اسرائیلی وزیراعظم نے یہ بھی دعویٰ کیا کہ رواں سال انتخابات کے بعد وہ ایک وسیع قومی حکومت تشکیل دینے میں کامیاب ہوں گے۔

گزشتہ روز امریکی وزیر خارجہ مارکو روبیو کی موجودگی میں لبنان اور اسرائیل کے درمیان امن معاہدہ طے پایا تھا، جس کے تحت اسرائیل کو اپنے شہریوں کو درپیش خطرات کے خاتمے تک لبنان میں اپنی فوج برقرار رکھنے کی اجازت دی گئی ہے۔

معاہدے میں دونوں فریقوں نے حزب اللہ کو غیر مسلح کرنے اور اس کے عسکری ڈھانچے کے خاتمے کے لیے اقدامات پر بھی اتفاق کیا ہے۔

دوسری جانب حزب اللہ نے اس معاہدے کو مسترد کر دیا ہے۔ معاہدے کے اعلان کے بعد بیروت سمیت لبنان کے مختلف شہروں میں احتجاجی مظاہرے شروع ہوگئے، جہاں مظاہرین نے ٹائر نذرِ آتش کیے، سڑکیں بند کیں اور حکومت کے خلاف شدید نعرے بازی کی۔