ویب ڈیسک:دو صدیوں سے زائد عرصے سے ایک معمہ بنا ہوا نپولین بوناپارٹ کے دور کا خفیہ خط بالآخر مصنوعی ذہانت کی مدد سے ڈی کوڈ کر لیا گیا۔

یہ خط 1809 میں نپولین کے سوتیلے بیٹے ایوژین نے فرانسیسی جنرل آگستے ڈی مارمون کو بھیجا تھا۔ خط کی پہلی سطر عام فرانسیسی زبان میں لکھی گئی تھی، تاہم اس کے بعد 24 سطروں میں دو ہندسوں کے نمبرز، مختلف حروف اور عجیب و غریب نشانات استعمال کیے گئے تھے۔

اصل خط کے ساتھ موجود خفیہ کوڈ کی ’کی‘ وقت گزرنے کے ساتھ گم ہوگئی، جس کے باعث ماہرین 217 سال تک اس کا مکمل مفہوم سمجھنے میں کامیاب نہیں ہو سکے۔

سائبر سکیورٹی کمپنی سینٹینل ون کے انجینئر کارٹر چرچ نے جی پی ٹی-6 آسٹرا کی مدد سے اس کوڈ کو ڈی کوڈ کرنے کا دعویٰ کیا ہے۔ ان کے مطابق مصنوعی ذہانت نے صرف خط کی ایک اسکین شدہ تصویر سے تقریباً 1300 خفیہ نشانات کو پڑھا اور ان کا تجزیہ کیا، جبکہ پورا عمل تقریباً چھ گھنٹوں میں مکمل ہوا۔

ڈی کوڈ کیے گئے خط میں 1809 کی جنگ سے قبل فرانسیسی، اتحادی اور آسٹریائی فوجوں کی پوزیشنز اور فوجی منصوبہ بندی سے متعلق معلومات موجود تھیں۔ خط میں روسی فوج کی آسٹریا کے خلاف پیش قدمی کا بھی ذکر کیا گیا تھا۔

دلچسپ بات یہ ہے کہ یہ خط نپولین نے خود نہیں لکھا تھا بلکہ ان کے حکم پر ان کے سوتیلے بیٹے ایوژین نے جنرل مارمون کو بھیجا تھا، تاہم اس میں نپولین کی فوجی ہدایات شامل تھیں۔

ماہرین کے مطابق اس کامیابی کی اہمیت صرف نپولین کے خط تک محدود نہیں بلکہ یہ مثال اس بات کی نشاندہی کرتی ہے کہ جدید مصنوعی ذہانت تاریخی دستاویزات، قدیم خفیہ کوڈز اور ایسے معموں کو سمجھنے میں کس طرح مددگار ثابت ہو سکتی ہے جو طویل عرصے سے انسانی ماہرین کے لیے چیلنج بنے ہوئے ہیں۔