ویب ڈیسک:برطانیہ میں نومولود بچوں کے ناموں سے متعلق تازہ سرکاری اعداد و شمار نے ایک بار پھر ثابت کر دیا ہے کہ ’محمد‘ ملک کے مقبول ترین لڑکوں کے ناموں میں سرفہرست ہے۔

برطانوی ادارہ برائے قومی شماریات (او این ایس) کی نئی رپورٹ کے مطابق 2025 کے دوران انگلینڈ اور ویلز میں پیدا ہونے والے تقریباً 6 ہزار بچوں کا نام ’محمد‘ رکھا گیا، جس کے باعث یہ مسلسل تیسرے سال بھی سب سے زیادہ منتخب کیا جانے والا لڑکوں کا نام بن گیا۔ اس فہرست میں ’نوح‘ دوسرے نمبر پر رہا، جبکہ لیو اور لوکا نے بالترتیب تیسری اور چوتھی پوزیشن حاصل کی۔ دوسری جانب آرتھر، اولیور اور جارج جیسے ناموں کی درجہ بندی میں کمی دیکھی گئی۔

لڑکیوں کے ناموں میں اولیویا نے اپنی پہلی پوزیشن برقرار رکھی، جبکہ للی، امیلیا، آئلا اور فلورنس بھی والدین کی پسندیدہ ناموں کی فہرست میں شامل رہیں۔

رپورٹ کے مطابق ’محمد‘ 2016 سے مسلسل انگلینڈ اور ویلز کے 10 مقبول ترین لڑکوں کے ناموں میں شامل ہے۔ یہ نام پہلی بار 1997 میں ٹاپ 100 فہرست کا حصہ بنا تھا، جبکہ اس کے مختلف ہجے 1954 سے ہی سرکاری ریکارڈ میں موجود ہیں۔

ماہرین کا کہنا ہے کہ برطانیہ میں مسلم آبادی میں مسلسل اضافے، مذہبی وابستگی اور ثقافتی شناخت نے اس نام کی مقبولیت کو مزید مضبوط کیا ہے۔ سرکاری اعداد و شمار کے مطابق برطانیہ میں مسلمانوں کی تعداد تقریباً 40 لاکھ ہے، جو ملک کی مجموعی آبادی کا لگ بھگ 6 فیصد بنتی ہے۔

رپورٹ میں یہ بھی نشاندہی کی گئی ہے کہ برطانیہ میں بچوں کے ناموں کے انتخاب میں ثقافتی تنوع پہلے سے کہیں زیادہ نمایاں ہو رہا ہے۔ نوح، لیو، لوکا، ازابیلا اور فریا جیسے نام مختلف زبانوں اور ثقافتوں کی نمائندگی کرتے ہیں، جو ملک کے کثیرالثقافتی معاشرے کی عکاسی ہے۔

اسلامی ممالک سمیت دنیا بھر کی مسلم برادری میں ’محمد‘ نام پیغمبرِ اسلام حضرت محمد ﷺ کی نسبت سے عقیدت اور احترام کے اظہار کے طور پر رکھا جاتا ہے، یہی وجہ ہے کہ گزشتہ چند برسوں سے برطانیہ میں بھی اس نام کی مقبولیت مسلسل برقرار ہے۔