مراکش نے اپنی اہم ساحلی شاہراہ کو امریکی صدر ڈونلڈ ٹرمپ کے نام سے منسوب کرتے ہوئے اس کا نیا نام "ڈونلڈ جے ٹرمپ شاہراہ" رکھ دیا ہے۔ اس فیصلے کا اعلان مراکش کے شاہ محمد ششم کی جانب سے جاری کیے گئے شاہی فرمان کے ذریعے کیا گیا۔

عرب میڈیا رپورٹس کے مطابق یہ شاہراہ جنوبی مراکش میں تزنیت سے داخلہ تک جاتی ہے اور اس کی مجموعی لمبائی تقریباً 655 میل (ایک ہزار 55 کلومیٹر) ہے۔ اس شاہراہ کو پہلے تزنیت، داخلہ ایکسپریس وے کے نام سے جانا جاتا تھا۔

رپورٹس کے مطابق اس اہم شاہراہ کی تعمیر پر تقریباً ایک ارب امریکی ڈالر لاگت آئی تھی۔ یہ منصوبہ مراکش کے جنوبی علاقوں کو ملک کے دیگر حصوں سے جوڑنے کے لیے بنیادی اہمیت رکھتا ہے اور اسے ملک کے بڑے بنیادی ڈھانچے کے منصوبوں میں شمار کیا جاتا ہے۔

شاہی فرمان کے بعد امریکی صدر ڈونلڈ ٹرمپ نے اپنے ایک پیغام میں مراکش کے شاہ محمد ششم کا شکریہ ادا کیا۔ انہوں نے کہا کہ وہ اس اعزاز پر شاہ مراکش کے بے حد شکر گزار ہیں اور امید کرتے ہیں کہ مستقبل قریب میں انہیں اس خوبصورت شاہراہ پر سفر کرنے کا موقع بھی ملے گا۔

ٹرمپ نے اپنے بیان میں اس اقدام کو دونوں ممالک کے درمیان دوستانہ تعلقات کی علامت قرار دیا، جبکہ مراکش کی جانب سے اس فیصلے کی مزید تفصیلات جاری نہیں کی گئیں۔

واضح رہے کہ تزنیت سے داخلہ تک قائم یہ ساحلی شاہراہ مراکش کے اہم ترقیاتی منصوبوں میں شامل ہے، جو جنوبی علاقوں میں تجارت، سیاحت اور آمدورفت کو فروغ دینے کے لیے تعمیر کی گئی تھی۔ اب اسے امریکی صدر ڈونلڈ ٹرمپ کے نام سے منسوب کیے جانے کے بعد یہ شاہراہ بین الاقوامی سطح پر بھی توجہ کا مرکز بن گئی ہے۔