ہیوسٹن: فیفا ورلڈ کپ 2026 کے راؤنڈ آف 16 میں مراکش نے عمدہ کھیل پیش کرتے ہوئے مشترکہ میزبان کینیڈا کو 3-0 سے شکست دے کر کوارٹر فائنل کے لیے کوالیفائی کر لیا۔

امریکی شہر ہیوسٹن میں کھیلے گئے میچ کے پہلے ہاف میں دونوں ٹیموں کے درمیان سخت مقابلہ دیکھنے میں آیا۔ کینیڈا نے ابتدائی لمحات میں جارحانہ کھیل پیش کرتے ہوئے کئی خطرناک حملے کیے، تاہم مراکش کے تجربہ کار گول کیپر یاسین بونو نے شاندار سیوز کے ذریعے اپنی ٹیم کو نقصان سے محفوظ رکھا۔

دسویں منٹ میں کینیڈا کے تانی اولوواسیئی کی خطرناک کوشش کو بھی بونو نے ناکام بنا دیا، جبکہ متعدد کارنرز حاصل کرنے کے باوجود میزبان ٹیم گول کرنے میں ناکام رہی۔

پہلے ہاف کے دوران مراکش کو اس وقت دھچکا پہنچا جب اسماعیل صیباری انجری کے باعث میدان چھوڑنے پر مجبور ہوگئے، جس کے بعد ان کی جگہ سفیان رحیمی کو میدان میں اتارا گیا۔ وقفے سے قبل مراکش کے کپتان اشرف حکیمی اور کینیڈا کے رچی لاریہ کے درمیان تلخ جملوں کا تبادلہ بھی ہوا، جس پر ریفری مائیکل اولیور نے دونوں کھلاڑیوں کو یلو کارڈ دکھایا۔ پہلے ہاف میں مجموعی طور پر چھ کھلاڑیوں کو وارننگ دی گئی۔

دوسرے ہاف کے آغاز کے ساتھ ہی مراکش نے کھیل پر مکمل گرفت حاصل کر لی۔ 50ویں منٹ میں اشرف حکیمی کی فری کک پر عزالدین اوناحی نے شاندار فرسٹ ٹائم شاٹ کے ذریعے گیند جال میں پہنچا کر اپنی ٹیم کو برتری دلائی۔ کینیڈا کے گول کیپر میکسم کریپو دفاعی کھلاڑیوں کی اوٹ میں آنے کے باعث بروقت گیند نہ دیکھ سکے۔

برتری کے بعد کینیڈا نے واپسی کی بھرپور کوشش کی، لیکن مراکش کے منظم دفاع نے میزبان ٹیم کے تمام حملے ناکام بنا دیے۔ 82ویں منٹ میں تیز رفتار جوابی حملے کے دوران عزالدین اوناحی نے اپنا دوسرا اور ٹیم کا دوسرا گول اسکور کرکے مراکش کی فتح تقریباً یقینی بنا دی۔

میچ کے اضافی وقت میں متبادل کھلاڑی سفیان رحیمی نے تیسرا گول کرکے کینیڈا کی واپسی کی تمام امیدیں ختم کر دیں۔

اس کامیابی کے ساتھ مراکش نے مسلسل دوسرے فیفا ورلڈ کپ کے کوارٹر فائنل میں جگہ بنا لی، جبکہ کینیڈا ٹورنامنٹ سے باہر ہونے والا پہلا میزبان ملک بن گیا۔