سعودی عرب کے ولی عہد اور وزیراعظم شہزادہ محمد بن سلمان اور ترکیہ کے صدر رجب طیب اردوان کے درمیان ٹیلیفون پر رابطہ ہوا، جس میں دونوں رہنماؤں نے علاقائی صورتحال، دوطرفہ تعلقات، غزہ امن منصوبے اور بحیرہ احمر کی سیکیورٹی سمیت مختلف اہم امور پر تفصیلی تبادلہ خیال کیا۔

غیر ملکی میڈیا رپورٹس کے مطابق گفتگو کے دوران دونوں رہنماؤں نے خطے میں امن و استحکام کے فروغ کے لیے مشترکہ کوششوں کی ضرورت پر زور دیا۔ اس موقع پر بحیرہ احمر میں جہاز رانی کے تحفظ اور علاقائی سلامتی سے متعلق تعاون بڑھانے پر بھی اتفاق کیا گیا۔

رپورٹس کے مطابق صدر رجب طیب اردوان نے حوثیوں کی جانب سے تجارتی جہازوں پر حملوں کی شدید مذمت کرتے ہوئے بحیرہ احمر میں سعودی عرب کے ساتھ مکمل یکجہتی کا اظہار کیا۔ انہوں نے سعودی قیادت میں قائم بحری دفاعی اتحاد کا خیرمقدم بھی کیا۔

دونوں رہنماؤں نے سعودی عرب اور ترکیہ کے درمیان دوطرفہ تعاون کو مزید مضبوط بنانے کے عزم کا اعادہ کرتے ہوئے مختلف شعبوں میں روابط بڑھانے پر اتفاق کیا۔

غزہ کی صورتحال پر گفتگو کے دوران صدر اردوان نے زور دیا کہ غزہ امن منصوبے کے دوسرے مرحلے کے روڈ میپ پر اسرائیل کی جانب سے مکمل عملدرآمد منصوبے کی کامیابی کے لیے ناگزیر ہے۔

واضح رہے کہ امریکی صدر ڈونلڈ ٹرمپ کے بورڈ آف پیس نے حال ہی میں غزہ میں جنگ کے خاتمے، جامع امن اور تعمیر نو کے لیے "روڈ میپ 2026" جاری کیا ہے۔ اقوام متحدہ کی سلامتی کونسل کی قرارداد 2803 کے تحت تیار کیے گئے 15 نکاتی فریم ورک کا مقصد غزہ میں پائیدار امن، مؤثر حکمرانی اور تعمیر نو کے عمل کو آگے بڑھانا ہے۔