ایران کے سپریم لیڈر آیت اللہ سید علی مجتبیٰ خامنہ ای کے سینئر مشیر محمد مخبر نے خبردار کیا ہے کہ اگر ایرانی انفرااسٹرکچر کو نشانہ بنایا گیا تو اس کے نتائج صرف میدانِ جنگ تک محدود نہیں رہیں گے بلکہ امریکی حاکمانہ نظام اور مغربی عالمی نظام بھی شدید متاثر ہوگا۔

غیر ملکی ذرائع ابلاغ کے مطابق محمد مخبر نے اپنے بیان میں کہا کہ امریکا معاملات کا جائزہ فوجی طاقت کے توازن کی بنیاد پر لیتا ہے، جبکہ ایران تاریخ کی منطق اور طویل المدتی حقائق کو سامنے رکھ کر فیصلے کرتا اور جواب دیتا ہے۔

انہوں نے کہا کہ اگر ایران کے بنیادی انفرااسٹرکچر پر حملے کیے گئے تو اس کے اثرات میدانِ جنگ سے باہر بھی محسوس کیے جائیں گے اور مغربی طاقتوں کی جانب سے گزشتہ ڈھائی سو برس میں قائم کیا گیا عالمی نظام تباہی کے دہانے پر پہنچ جائے گا۔

محمد مخبر کا کہنا تھا کہ ایسے حالات میں اس نظام کے بنیادی ستون گر جائیں گے، جس کے بعد نہ قیادت کے لیے کوئی مؤثر کمانڈ سینٹر باقی رہے گا اور نہ ہی استحصال اور لوٹ مار پر مبنی عالمی منڈی اپنا وجود برقرار رکھ سکے گی۔

انہوں نے مزید کہا کہ ایران اپنے قومی مفادات اور بنیادی ڈھانچے کے تحفظ کے لیے ہر ممکن اقدام کرے گا اور کسی بھی جارحیت کا مناسب جواب دینے کی صلاحیت رکھتا ہے۔