ڈھاکا:بنگلادیش کے ارکانِ پارلیمنٹ نے حکمران جماعت بنگلادیش نیشنلسٹ پارٹی کے سینئر رہنما مرزا فخر الاسلام عالمگیر کو ملک کا نیا صدر منتخب کرلیا ہے۔

غیر ملکی خبررساں ادارے کے مطابق صدارتی عہدہ بنگلادیش میں زیادہ تر رسمی نوعیت کا ہے، تاہم صدر مملکت ملک کے سربراہ ہونے کے ساتھ مسلح افواج کے کمانڈر انچیف کی ذمہ داریاں بھی انجام دیتے ہیں۔ ملک کے انتظامی اختیارات بدستور وزیراعظم اور کابینہ کے پاس رہیں گے۔

رپورٹ کے مطابق 78 سالہ مرزا فخر الاسلام عالمگیر نے پارلیمانی انتخاب میں ریٹائرڈ آرمی کرنل، لبرل ڈیموکریٹک پارٹی کے سربراہ اور جماعت اسلامی کی قیادت میں قائم 11 جماعتی اپوزیشن اتحاد کے امیدوار اولی احمد کو شکست دی۔

صدارتی انتخاب میں مرزا فخر الاسلام عالمگیر نے 255 ووٹ حاصل کیے، جبکہ ان کے مدمقابل اولی احمد کو 88 ووٹ ملے۔ حکمران جماعت بنگلادیش نیشنلسٹ پارٹی رواں برس 12 فروری کو ہونے والے عام انتخابات میں کامیابی کے بعد اپنے اتحادیوں کے ساتھ پارلیمنٹ میں دو تہائی اکثریت حاصل کرچکی ہے، جس کے باعث صدارتی انتخاب میں بھی حکومتی امیدوار کی کامیابی یقینی سمجھی جارہی تھی۔

بنگلادیش میں 2024 میں شیخ حسینہ کی عوامی لیگ حکومت کے خاتمے کے بعد سیاسی منظرنامے میں نمایاں تبدیلیاں آئیں اور رواں برس فروری میں بنگلادیش نیشنلسٹ پارٹی دوبارہ اقتدار میں آگئی۔

مرزا فخر الاسلام عالمگیر کا انتخاب سابق صدر محمد شہاب الدین کے مستعفی ہونے کے بعد عمل میں آیا۔ محمد شہاب الدین نے اپنی پانچ سالہ آئینی مدت مکمل ہونے سے قبل گزشتہ ماہ خرابی صحت کے باعث عہدہ چھوڑ دیا تھا۔