نیوزڈیسک:عالمی شہرت یافتہ عظیم گلوکار اور شہنشاہ ِ غزل کہلائے جانے استاد مہدی حسن کو ہم سے بچھڑے چودہ برس بیت گئے، تاہم ان کی سحر انگیز آواز اور لازوال فن آج بھی موسیقی کے شائقین کے دلوں میں زندہ ہے۔

مہدی حسن اٹھارہ جولائی انیس سو ستائیس کو بھارتی ریاست راجھستان میں پیدا ہوئے ،انہوں نے گلوکاری کا باقاعدہ آغاز انیس سو باون میں ریڈیو پاکستان سے کیا۔

مہدی حسن غزل گائیکی کا وہ درخشاں باب تھے جنہوں نے محبت، احساسات اور جذبات کو سروں میں پرو کر ایک نئی پہچان دی۔ ان کی گائی ہوئی غزلیں آج بھی کانوں میں رس گھولتی اور سامعین کو مسحور کر دیتی ہیں۔

علاوہ ازا ں مہدی حسن نے پاکستان کی فلم انڈسٹری میں بھی اپنی آواز کا جادو جگایا، جبکہ فلم ’’فرنگی‘‘ کے گیت نے انہیں شہرت کی بلندیوں تک پہنچایا۔

استاد مہدی حسن کو کلاسیکل موسیقی کے مشکل راگوں پر غیر معمولی عبور حاصل تھا، جس کی بدولت انہیں پاکستان سمیت دنیا بھر میں بے پناہ پذیرائی حاصل ہوئی۔

انہیں یہ اعزاز بھی حاصل تھا کہ کلاسیکل موسیقی اور غزل گائیکی کے رموز سے گہری واقفیت کے ساتھ قدرت نے انہیں ایک منفرد، خوبصورت اور مسحور کن آواز سے نوازا تھا، انہوں نےپچیس ہزار سے زائد فلمی ،غیرفلمی گیت، ملی نغمے اور غزلیں گائیں ۔مہدی حسن کو مشکل راگوں پر بھی کمال گرفت حاصل تھی وہ آوازجو دلوں کو چھو لیتی تھی وہ شہنشاہ غزل مہدی حسن کی آواز تھی اسی بات پرمایہ ناز بھارتی گلوکارہ لتا منگیشتر نے کہا تھا کہ ان کے گلے میں بھگوان بولتا ہے

انہیں حکومت پاکستان کی جانب سے تمغہ حسن کارکردگی اور ہلال امتیاز سمیت تمام نمایاں قومی سطح کے ایوارڈ سے نوازا گیا۔

گائیکی کے میدان میں بام عروج پر پہنچنے کی طویل جدوجہد کے بعد مہدی حسن فالج، سینے اور سانس کی مختلف بیماریوں کا شکار ہوگئے اور طویل علالت کے بعد 13 جون 2012 کو کراچی میں اپنے خالق حقیقی سے جاملے۔مگر ان کا فن آج بھی موسیقی کے افق پر روشن ہے اور ان کی یاد مداحوں کے دلوں میں ہمیشہ زندہ رہے گی۔