ریاض:سعودی عرب کے وزیر خارجہ شہزادہ فیصل بن فرحان نے پاکستان، سعودی عرب اور ترکیہ کے درمیان مکہ دفاعی معاہدے پر دستخط کو تینوں برادر ممالک کے درمیان دفاعی تعاون، علاقائی سلامتی اور مشترکہ خوشحالی کے لیے اہم سنگِ میل قرار دیا ہے۔

شہزادہ فیصل بن فرحان نے سماجی رابطے کی ویب سائٹ ایکس پر جاری اپنے بیان میں کہا کہ سعودی ولی عہد، ترک صدر اور وزیراعظم پاکستان کی جانب سے مشترکہ مکہ دفاعی معاہدے پر دستخط تینوں ممالک کے درمیان موجود برادرانہ تعلقات اور باہمی اعتماد کی توثیق کرتے ہیں۔

سعودی وزیر خارجہ کے مطابق یہ معاہدہ دفاعی تعاون کو مزید مضبوط بنانے کی سمت ایک اہم پیش رفت ہے۔ انہوں نے کہا کہ معاہدہ خطے کو درپیش مشترکہ خطرات سے نمٹنے کے لیے پاکستان، سعودی عرب اور ترکیہ کی مشترکہ کوششوں اور باہمی تعاون کی عکاسی کرتا ہے۔

شہزادہ فیصل بن فرحان نے کہا کہ مکہ دفاعی معاہدہ علاقائی سلامتی، استحکام اور امن کے تحفظ کے لیے تینوں ممالک کے مشترکہ سیاسی عزم کا مظہر ہے۔ ان کے مطابق معاہدہ خطے میں زیادہ محفوظ اور مستحکم ماحول کے قیام میں بھی معاون ثابت ہوگا۔

انہوں نے مزید کہا کہ پاکستان، سعودی عرب اور ترکیہ کے درمیان بڑھتا ہوا تعاون نہ صرف دفاعی شعبے میں باہمی رابطوں کو مضبوط کرے گا بلکہ مستقبل میں ترقی اور خوشحالی کے نئے مواقع بھی پیدا کرے گا۔

سعودی وزیر خارجہ کا کہنا تھا کہ مکہ دفاعی معاہدہ تینوں ممالک کے عوام کے لیے ایک محفوظ مستقبل کی راہ ہموار کرے گا، جس کے نتیجے میں ترقی، اقتصادی مواقع اور مشترکہ خوشحالی کو فروغ ملے گا۔

انہوں نے اس امید کا اظہار کیا کہ معاہدے کے مثبت اثرات تینوں برادر ممالک کے عوام تک پہنچیں گے اور باہمی تعاون کے ذریعے خطے میں امن، استحکام اور خوشحالی کے فروغ کی کوششیں مزید آگے بڑھیں گی۔