ویب ڈیسک:اسلامی ممالک نے سعودی عرب، پاکستان اور ترکیہ کے درمیان طے پانے والے مکہ دفاعی معاہدے کا خیرمقدم کرتے ہوئے اسے خطے میں امن، استحکام اور دفاعی تعاون کے فروغ کی جانب اہم پیش رفت قرار دیا ہے۔

ترکیہ کے صدر رجب طیب اردوان نے مکہ دفاعی معاہدے کو سیکیورٹی اور دفاعی شعبے کے لیے اہم قرار دیتے ہوئے کہا کہ اس کے نتیجے میں تینوں ممالک کے درمیان دفاعی تعاون اور دفاعی صنعت کو مزید مضبوط بنانے میں مدد ملے گی۔ ان کا کہنا تھا کہ یہ معاہدہ کسی ملک کے خلاف نہیں بلکہ امن، سلامتی اور علاقائی استحکام کے مقصد کے تحت کیا گیا ہے۔

سعودی وزیر خارجہ شہزادہ فیصل بن فرحان نے بھی معاہدے کا خیرمقدم کرتے ہوئے کہا کہ سعودی عرب، پاکستان اور ترکیہ کے درمیان دفاعی تعاون کا یہ معاہدہ امن اور ترقی کے لیے ایک اہم سنگ میل ثابت ہوگا۔

تنظیم تعاون اسلامی کے سیکریٹری جنرل حسین ابراہیم طہٰ نے بھی مکہ دفاعی معاہدے کی حمایت کا اظہار کیا۔ انہوں نے اسے ایک اہم اسٹریٹیجک پیش رفت قرار دیتے ہوئے کہا کہ یہ معاہدہ اسلامی ممالک کے درمیان یکجہتی اور باہمی تعاون کی عکاسی کرتا ہے۔

حرمین شریفین کے مذہبی امور کے سربراہ ڈاکٹر عبدالرحمٰن بن عبدالعزیز السدیس نے بھی معاہدے کا خیرمقدم کیا۔ ان کے مطابق مقدس شہر مکہ مکرمہ میں اس معاہدے کا طے پانا اسے خصوصی اہمیت عطا کرتا ہے۔

دوسری جانب بحرین نے بھی سعودی عرب، پاکستان اور ترکیہ کے درمیان دفاعی معاہدے کی حمایت کرتے ہوئے اسے تینوں برادر ممالک کی دفاعی صلاحیتوں اور عسکری مہارت کا اعتراف قرار دیا۔

یمن نے بھی مکہ دفاعی معاہدے کی حمایت کا اعلان کیا ہے۔ یمنی وزارت خارجہ کے مطابق بحیرہ احمر، خلیج عدن اور باب المندب کی سلامتی کے تناظر میں یہ معاہدہ خصوصی اہمیت رکھتا ہے اور خطے میں امن و استحکام کے لیے مؤثر ثابت ہوسکتا ہے۔

سعودی عرب، پاکستان اور ترکیہ کے درمیان ہونے والے اس معاہدے کو اسلامی ممالک کے باہمی دفاعی تعاون کو مزید مستحکم کرنے کی جانب اہم قدم قرار دیا جا رہا ہے۔