ریاض: ترک صدر رجب طیب ایردوان نے کہا ہے کہ سعودی عرب، پاکستان اور ترکیہ کے درمیان طے پانے والا مکہ مشترکہ دفاعی معاہدہ کسی ملک کے خلاف نہیں بلکہ خطے میں امن، استحکام، دفاعی تعاون اور خوش حالی کے فروغ کی جانب ایک اہم پیش رفت ہے۔

ترک صدر نے سماجی رابطے کی ویب سائٹ ایکس پر جاری اپنے بیان میں کہا کہ انہوں نے سعودی ولی عہد و وزیراعظم شہزادہ محمد بن سلمان کی دعوت پر مکہ مکرمہ کا دورہ کیا، جہاں ان کی سعودی ولی عہد اور وزیراعظم پاکستان شہباز شریف سے ملاقات ہوئی۔

رجب طیب ایردوان کے مطابق ملاقات کے دوران پاکستان، سعودی عرب اور ترکیہ کے درمیان مشترکہ دفاعی معاہدے پر دستخط کیے گئے۔ ان کا کہنا تھا کہ معاہدے کا بنیادی مقصد تینوں ممالک کی اجتماعی دفاعی صلاحیت کو مزید مضبوط بنانا، دفاعی صنعت کے شعبے میں مشترکہ منصوبوں کو فروغ دینا اور امن کو درپیش خطرات کے خلاف مؤثر تعاون کو وسعت دینا ہے۔

ترک صدر نے کہا کہ مکہ دفاعی معاہدہ اقوام متحدہ کے منشور کے آرٹیکل 51 میں تسلیم کیے گئے حق دفاع کی بھی توثیق کرتا ہے۔ انہوں نے واضح کیا کہ یہ معاہدہ کسی مخصوص ملک یا فریق کے خلاف نہیں بلکہ خطے میں امن، خوش حالی اور استحکام کے خواہاں تمام برادر ممالک کے لیے تعاون کا راستہ کھولتا ہے۔

انہوں نے کہا کہ ترکیہ خطے میں جاری تنازعات اور بحرانوں کے حل کے لیے بات چیت اور سفارت کاری پر مبنی اپنے اصولی مؤقف پر قائم رہے گا۔ ان کے مطابق پائیدار امن کے قیام کے لیے مذاکرات اور سفارتی ذرائع کو ترجیح دینا ضروری ہے۔

رجب طیب ایردوان نے اس امید کا اظہار کیا کہ پاکستان، سعودی عرب اور ترکیہ کے درمیان طے پانے والا یہ معاہدہ تینوں ممالک کے باہمی تعلقات کو مزید مضبوط بنانے کے ساتھ ساتھ پورے خطے میں امن، استحکام اور خوش حالی کے فروغ میں بھی معاون ثابت ہوگا۔

ترک صدر نے دعا کی کہ مکہ دفاعی معاہدہ پورے خطے کے لیے خیر و برکت، امن اور استحکام کا باعث بنے اور اس کے نتیجے میں تینوں برادر ممالک کے درمیان تعاون کے نئے مواقع پیدا ہوں۔