امریکا میں ہونے والی ایک نئی طبی تحقیق سے معلوم ہوا ہے کہ عمر رسیدہ افراد میں معمول سے زیادہ دیر تک سونے کی عادت الزائمر کی بیماری سے وابستہ ابتدائی تبدیلیوں کی نشاندہی کر سکتی ہے۔ ماہرین کا کہنا ہے کہ اگر کوئی بزرگ مستقل طور پر رات میں ساڑھے آٹھ گھنٹے یا اس سے زیادہ نیند لیتا ہے تو اس کے دماغ میں ایسی حیاتیاتی تبدیلیاں موجود ہو سکتی ہیں، جو مستقبل میں الزائمر سے تعلق رکھتی ہوں۔

تحقیق کے مطابق نیند اور دماغی صحت کا تعلق انتہائی گہرا ہے۔ ماہرین کا کہنا ہے کہ ناکافی یا غیر معیاری نیند دماغ میں ایمیلائیڈ بیٹا جیسے نقصان دہ پروٹینز کے جمع ہونے کا باعث بن سکتی ہے، جبکہ دن کے وقت زیادہ سونا یا رات کی نیند کا مسلسل متاثر رہنا بھی الزائمر کی ابتدائی علامات میں شمار کیا جا سکتا ہے۔

یہ تحقیق امریکا کی یو ٹی ہیلتھ سان انتونیو کے سائنس دانوں نے کی، جس کے نتائج طبی جریدے Alzheimer’s & Dementia میں شائع ہوئے۔ محققین نے فریمنگھم ہارٹ اسٹڈی میں شامل 2 ہزار 410 افراد کے ڈیٹا کا تجزیہ کیا، جن کی اوسط عمر تقریباً 70 سال تھی اور ان میں نصف سے زیادہ خواتین شامل تھیں۔

تحقیق کے دوران شرکاء کی روزانہ نیند کے دورانیے کا موازنہ دماغی صحت سے متعلق مختلف خون کے بائیو مارکرز سے کیا گیا۔ اس عمل میں فاسفوریلیٹڈ ٹاؤ 181 (p-tau181) نامی پروٹین پر خصوصی توجہ دی گئی، جسے الزائمر سے وابستہ اہم حیاتیاتی اشارہ تصور کیا جاتا ہے کیونکہ یہ دماغی خلیات میں جمع ہونے سے بیماری کے آغاز کا عندیہ دے سکتا ہے۔

نتائج سے معلوم ہوا کہ جو افراد روزانہ ساڑھے آٹھ سے نو گھنٹے سوتے تھے، ان کے خون میں p-tau181 کی سطح نسبتاً زیادہ تھی، جبکہ 10 گھنٹے یا اس سے زائد نیند لینے والوں میں اس پروٹین کی مقدار مزید بلند ریکارڈ کی گئی۔

محققین نے عمر، جنس، ذہنی دباؤ، سلیپ اپنیا اور موروثی خطرات جیسے عوامل کو بھی تجزیے میں شامل کیا، مگر ان تمام عوامل کے باوجود زیادہ دیر تک سونے اور مذکورہ پروٹین کی بلند سطح کے درمیان تعلق برقرار رہا۔

تاہم ماہرین نے واضح کیا کہ اس تحقیق سے یہ نتیجہ اخذ نہیں کیا جا سکتا کہ زیادہ نیند لینا براہِ راست الزائمر کا سبب بنتا ہے۔ ان کے مطابق زیادہ دیر تک سونا ممکنہ طور پر دماغ میں ہونے والی ابتدائی تبدیلیوں کی علامت بھی ہو سکتا ہے، جو یادداشت متاثر ہونے سے پہلے ظاہر ہونا شروع ہو جاتی ہیں۔

ماہرین کا کہنا ہے کہ بیماری، شدید جسمانی تھکن یا ذہنی دباؤ کے باعث کبھی کبھار زیادہ سونا معمول کی بات ہو سکتی ہے، لیکن اگر کوئی بزرگ بغیر کسی واضح وجہ کے مسلسل روزانہ نو سے دس گھنٹے یا اس سے زیادہ نیند لینے لگے تو اسے نظر انداز نہیں کرنا چاہیے۔ ایسی صورت میں دماغی صحت کا جائزہ لینے کے لیے ماہر معالج سے رجوع کرنا بہتر ہے۔