پشاور:خیبرپختونخوا حکومت نے خواتین کو ماحول دوست سفری سہولت فراہم کرنے کے لیے برقی موٹر سائیکلوں کی اسکیم متعارف کرانے کا فیصلہ کرلیا، جس کی صوبائی کابینہ نے باقاعدہ منظوری دے دی ہے۔ اسکیم کے تحت کالجوں اور جامعات کی طالبات سمیت ملازمت پیشہ خواتین کو میرٹ کی بنیاد پر برقی موٹر سائیکلیں فراہم کی جائیں گی۔

تفصیلات کے مطابق خیبرپختونخوا کابینہ کا اجلاس وزیراعلیٰ محمد سہیل آفریدی کی زیرصدارت ہوا، جس میں صوبے میں برقی سفری سہولیات کے فروغ سمیت مختلف امور پر غور کیا گیا۔ اجلاس میں خواتین کے لیے برقی موٹر سائیکل اسکیم شروع کرنے کی منظوری دی گئی۔

وزیراعلیٰ محمد سہیل آفریدی نے اجلاس سے خطاب کرتے ہوئے کہا کہ برقی موٹر سائیکل اسکیم کا پہلا مرحلہ بہت جلد شروع کیا جائے گا۔ ان کا کہنا تھا کہ اسکیم کے تحت موٹر سائیکلوں کی فراہمی مکمل طور پر میرٹ کی بنیاد پر کی جائے گی تاکہ مستحق طالبات اور ملازمت پیشہ خواتین کو سفری سہولت فراہم کی جاسکے۔

انہوں نے بتایا کہ برقی موٹر سائیکلوں کے بعد خیبرپختونخوا حکومت کی جانب سے برقی رکشوں کی اسکیم بھی متعارف کرائی جائے گی۔ ان کے مطابق برقی رکشوں کا اجرا صوبے میں صاف اور سرسبز ماحول کے فروغ کی جانب اہم قدم ثابت ہوگا۔

وزیراعلیٰ نے صوبے کے ڈویژنل ہیڈکوارٹرز میں برقی بسوں کی اسکیم پر کام مزید تیز کرنے کی بھی ہدایت کی۔ انہوں نے کہا کہ ماحول دوست سفری ذرائع کے فروغ سے نہ صرف شہریوں کو بہتر سفری سہولیات میسر آئیں گی بلکہ فضائی آلودگی میں کمی لانے میں بھی مدد ملے گی۔

صوبائی حکومت کا کہنا ہے کہ برقی گاڑیوں کے فروغ سے خیبرپختونخوا میں جدید اور ماحول دوست سفری نظام کو وسعت دینے کے ساتھ شہریوں کے لیے کم خرچ اور بہتر سفری سہولیات کی فراہمی بھی ممکن ہوگی۔