خیبر پختونخوا کے ضلع کرک میں پولیس اور کاؤنٹر ٹیررازم ڈیپارٹمنٹ نے انٹیلیجنس بیسڈ کارروائی کے دوران 2 خارجیوں کو ہلاک کردیا، جبکہ دیگر فرار ہونے میں کامیاب ہوگئے۔

ڈسٹرکٹ پولیس افسر کرک عمران خان کے مطابق علاقے میں کالعدم تنظیم کے اہلکاروں کی موجودگی کی اطلاع پر پولیس اور کاؤنٹر ٹیررازم ڈیپارٹمنٹ کو متحرک کیا گیا تھا۔ انٹیلیجنس معلومات کی بنیاد پر سی ٹی ڈی کوہاٹ ریجن نے ضلع کرک میں نیکی صاحب زیارت کے قریب تھانہ خرم کی حدود میں کارروائی کی۔

ڈی پی او کے مطابق کارروائی کے دوران مسلح افراد نے سکیورٹی اہلکاروں پر فائرنگ کردی، جس پر اہلکاروں نے جوابی کارروائی کی۔ فائرنگ کے تبادلے میں 2 خارجی ہلاک ہوگئے، جبکہ ان کے دیگر ساتھی اندھیرے کا فائدہ اٹھاتے ہوئے فرار ہوگئے۔

سی ٹی ڈی حکام کے مطابق کارروائی کے بعد ہلاک ہونے والے خارجیوں کے قبضے سے 2 ہینڈ گرینیڈز، 2 ایس ایم جیز، 6 میگزین اور متعدد کارتوس برآمد کیے گئے۔ حکام نے بتایا کہ ہلاک افراد علاقے میں تخریبی کارروائیوں کی منصوبہ بندی میں مصروف تھے۔

پولیس کے مطابق خارجی علاقے میں سڑک پر ناکہ بندی کرنے اور سڑک کنارے بارودی مواد نصب کرنے کی منصوبہ بندی کررہے تھے۔ انٹیلیجنس اطلاع ملنے کے بعد بروقت کارروائی کرتے ہوئے ان کے مذموم عزائم کو ناکام بنا دیا گیا۔

کارروائی کے بعد پولیس کی بھاری نفری نے علاقے کو گھیرے میں لے کر کلیئر کردیا۔ فرار ہونے والے دیگر مبینہ دہشتگردوں کی گرفتاری کے لیے علاقے میں سرچ آپریشن جاری ہے، جبکہ پولیس اور متعلقہ ادارے مزید شواہد اکٹھے کرنے میں مصروف ہیں۔