برگن اسٹاک:امریکی نائب صدر جے ڈی وینس نے کہا ہے کہ سوئٹزرلینڈ میں ہونے والی ایران سے متعلق بات چیت نتیجہ خیز رہی ہے اور امریکا اس عمل کو آگے بڑھاتا رہے گا۔

غیر ملکی میڈیا رپورٹس کے مطابق سوئٹزرلینڈ سے امریکا روانگی سے قبل ایئرپورٹ پر میڈیا سے گفتگو کرتے ہوئے جے ڈی وینس نے کہا کہ ایران کے منجمد فنڈز اس وقت تک بحال نہیں کیے جائیں گے جب تک بعض اہم مسائل کا حل نہیں نکل آتا۔

میڈیا سے گفتگو میں انہوں نے کہا کہ امریکا نے ایسے طریقہ کار کی درخواست کی ہے جس سے یہ یقینی بنایا جا سکے کہ ایران کے منجمد فنڈز کا غلط استعمال نہ ہو۔انہوں نے مزید کہا کہ ہم اس بات کو یقینی بنائیں گے کہ ایران کبھی بھی جوہری ہتھیار نہ بنا سکے۔ان کا کہنا تھا کہ اب ایندھن کی قیمتیں مزید کم ہوتی رہیں گی، علاقائی جنگ بندی یقینی بنانے کے لیے بھی مناسب نظام قائم کیا ہے۔

جے ڈی وینس کا کہنا تھا کہ ایران کو بین الاقوامی ایٹمی توانائی ایجنسی (آئی اے ای اے) کے معائنہ کاروں کو رسائی دینا ہوگی، جبکہ آئی اے ای اے کے انسپکٹرز کی جانب سے معائنہ ایران کے ساتھ جاری مذاکرات کا ایک اہم حصہ ہوگا۔

دوسری جانب امریکا نے ایران سے متعلق ابتدائی معاہدے پر خلیجی ممالک کو اعتماد میں لینے کا فیصلہ کیا ہے۔اس سلسلے میں امریکی وزیر خارجہ مارکو روبیو بحرین، کویت اور متحدہ عرب امارات کا دورہ کریں گے۔