تہران: ایران کی پاسدارانِ انقلاب (آئی آر جی سی) کی قدس فورس کے سربراہ بریگیڈیئر جنرل اسماعیل قانی نے اسرائیل کو سخت انتباہ دیتے ہوئے کہا ہے کہ اسے لبنان کے تمام علاقوں سے نکلنا ہوگا، بصورت دیگر اسے شکست کے بعد وہاں سے فرار ہونا پڑے گا۔

غیر ملکی میڈیا رپورٹس کے مطابق اسماعیل قانی نے جمعرات کو سماجی رابطے کی ویب سائٹ ایکس پر جاری اپنے بیان میں کہا کہ اسرائیل کو یہ حقیقت سمجھ لینی چاہیے کہ اس کے خلاف برسرپیکار افراد عاشورا کے جذبے اور امام حسینؑ کے عقیدے سے سرشار ہیں۔

انہوں نے کہا کہ مزاحمتی قوتیں اس ابدی نظریے پر یقین رکھتی ہیں کہ "ہر دن عاشورا ہے اور ہر سرزمین کربلا ہے۔"

اسماعیل قانی نے اسرائیل کو مخاطب کرتے ہوئے کہا، "صہیونیو! تمہیں ہر صورت لبنان سے نکلنا ہوگا۔ یہ سرزمین مزاحمت اور استقامت کی علامت ہے، قبضہ کرنے والوں کے لیے کھیل کا میدان نہیں۔"

انہوں نے مزید خبردار کیا کہ اگر اسرائیل نے رضاکارانہ طور پر لبنان نہ چھوڑا تو اسے شکست کا سامنا کرنا پڑے گا اور شرمندگی کے ساتھ وہاں سے فرار ہونا ہوگا۔

دوسری جانب اسرائیل نے مؤقف اختیار کیا ہے کہ جب تک لبنان حزب اللہ کو غیرمسلح نہیں کرتا، وہ اپنی فوج واپس نہیں بلائے گا۔ اسرائیلی حکام کا کہنا ہے کہ وہ اپنی سرحد کے قریب ایک مسلح تنظیم کو موجود رہنے کی اجازت نہیں دے سکتے۔

یہ بیان ایسے وقت میں سامنے آیا ہے جب اسرائیل پر لبنان میں جنگ بندی کی خلاف ورزی اور شہری علاقوں کو نشانہ بنانے کے الزامات عائد کیے جا رہے ہیں۔ رپورٹس کے مطابق ایران اور امریکا کے درمیان طے پانے والی مفاہمتی یادداشت میں لبنان میں جنگ کے خاتمے سے متعلق شق بھی شامل ہے۔