اسلام آباد: نائب وزیراعظم و وزیر خارجہ اسحاق ڈار نے ملائیشیا کے وزیر داخلہ داتوک سری سیف الدین نصر بن اسماعیل سے ملاقات کی، جس میں پاکستان اور ملائیشیا کے درمیان دوطرفہ تعلقات اور باہمی تعاون کے مختلف پہلوؤں پر تبادلہ خیال کیا گیا۔

وزارت خارجہ کے ترجمان کے مطابق ملاقات میں دونوں ممالک کے درمیان قریبی اور برادرانہ تعلقات کو مزید مضبوط بنانے کے عزم کا اعادہ کیا گیا۔ فریقین نے دوطرفہ تعاون کے موجودہ دائرہ کار کو وسعت دینے اور باہمی روابط مزید مستحکم کرنے کی ضرورت پر زور دیا۔

ملاقات کے دوران تجارت اور معیشت کے شعبوں میں تعاون بڑھانے کے امکانات کا جائزہ لیا گیا، جبکہ قانونی معاونت سمیت دیگر اہم شعبوں میں دوطرفہ تعاون کو مزید فروغ دینے کے امور بھی زیر بحث آئے۔

ترجمان کے مطابق اسحاق ڈار اور ملائیشین وزیر داخلہ نے باہمی دلچسپی کی علاقائی اور بین الاقوامی پیش رفت پر بھی تبادلہ خیال کیا۔ دونوں رہنماؤں نے خطے اور عالمی سطح پر رونما ہونے والی صورتحال کے تناظر میں باہمی مشاورت اور تعاون جاری رکھنے کی اہمیت پر اتفاق کیا۔

دونوں جانب سے اس عزم کا بھی اعادہ کیا گیا کہ پاکستان اور ملائیشیا امن و استحکام کے فروغ اور مشترکہ خوشحالی کے اہداف کے حصول کے لیے قریبی تعاون جاری رکھیں گے۔