لندن: نائب وزیراعظم اور وزیر خارجہ اسحاق ڈار نے لندن میں برطانوی وزیر خارجہ ایڈ ملی بینڈ سے ملاقات کی، جس کے دوران پاکستان اور برطانیہ کے دوطرفہ تعلقات سمیت علاقائی اور عالمی امور پر تفصیلی تبادلہ خیال کیا گیا۔

دفتر خارجہ کے مطابق ملاقات میں دونوں ممالک کی وزارتِ خارجہ کے درمیان وفود کی سطح پر مذاکرات بھی ہوئے۔ فریقین نے دونوں وزارتوں کے درمیان باضابطہ مذاکرات کے لیے ایک منظم طریقہ کار قائم کرنے پر اتفاق کیا، جس کے تحت مختلف شعبوں میں تعاون اور اہم معاملات پر پیش رفت کا باقاعدگی سے جائزہ لیا جائے گا۔

پاکستان اور برطانیہ نے باہمی دلچسپی کے امور پر اعلیٰ سطحی روابط اور قریبی رابطہ کاری کا سلسلہ جاری رکھنے کے عزم کا بھی اظہار کیا۔ ملاقات میں مشرق وسطیٰ کی صورتحال سمیت مختلف علاقائی اور عالمی معاملات پر غور کیا گیا۔

نائب وزیراعظم اسحاق ڈار نے برطانوی وزیر خارجہ کو مشرق وسطیٰ کے حوالے سے پاکستان کی سفارتی اور ثالثی کوششوں سے آگاہ کیا۔ دونوں رہنماؤں نے پاکستان اور بھارت کے درمیان سندھ طاس معاہدے سے متعلق پیش رفت پر بھی تبادلہ خیال کیا۔

اسحاق ڈار نے بھارت کی جانب سے بین الاقوامی ذمہ داریوں کی مسلسل خلاف ورزیوں کی نشاندہی کرتے ہوئے بین الاقوامی قانون اور معاہداتی ذمہ داریوں کی پاسداری کی اہمیت پر زور دیا۔

ملاقات کے دوران نائب وزیراعظم نے افغان سرزمین سے پاکستان کو لاحق امن و سلامتی کے خطرات پر بھی تشویش کا اظہار کیا۔ دونوں ممالک نے خطے میں امن، استحکام اور تعاون کے فروغ کے لیے مسلسل روابط اور قریبی رابطہ کاری برقرار رکھنے پر اتفاق کیا۔

فریقین نے پاکستان اور برطانیہ کے تعلقات کو مزید مضبوط بنانے میں پاکستانی تارکین وطن کے مثبت کردار کو بھی سراہا۔