مشرقِ وسطیٰ میں امریکا اور ایران کے درمیان جنگ کے باعث عراق کو تقریباً 60 ارب ڈالر کا نقصان ہوا ہے، جبکہ تیل کی برآمدات میں کمی، زرمبادلہ کے ذخائر میں گراوٹ اور مہنگائی نے ملکی معیشت کو شدید دباؤ سے دوچار کردیا ہے۔

عالمی خبر رساں ادارے کے مطابق عراقی وزیر خارجہ فواد حسین نے روم میں اپنے اطالوی ہم منصب سے ملاقات کے دوران خطے میں جاری کشیدگی کے ملکی معیشت پر پڑنے والے اثرات سے آگاہ کیا۔

عراقی وزارتِ تیل کے اعداد و شمار کے مطابق یکم سے 21 ستمبر کے دوران عراق کی تیل کی برآمدات یومیہ 26 لاکھ بیرل رہیں۔ ملک کی معیشت کا زیادہ تر انحصار تیل پر ہے، جو حکومتی آمدنی کا تقریباً 90 فیصد فراہم کرتا ہے۔

رپورٹ کے مطابق معاشی مشکلات کے باعث عراق کے زرمبادلہ کے ذخائر میں 20 ارب ڈالر کی کمی ہوئی، جبکہ اشیائے ضروریہ کی قیمتوں میں بھی تیزی سے اضافہ ریکارڈ کیا گیا۔ معاشی دباؤ کم کرنے کے لیے عراقی مرکزی بینک نے گزشتہ ہفتے تین سال سے زائد عرصے میں پہلی بار امریکی ڈالر کے مقابلے میں عراقی دینار کی قدر میں کمی کی۔

عراق تیل کی فروخت سے حاصل ہونے والی آمدنی کو درآمدات کی ادائیگی، ملکی کرنسی کو مستحکم رکھنے اور سرکاری ملازمین و پنشنرز کو تنخواہوں اور پنشن کی ادائیگی کے لیے استعمال کرتا ہے۔ تیل کی برآمدات متاثر ہونے سے ان مالی ذمہ داریوں کو پورا کرنا مزید مشکل ہوگیا ہے۔

حکام کے مطابق عراق نے 2037 تک غیر تیل ذرائع سے حاصل ہونے والی آمدنی کا حصہ موجودہ 10 فیصد سے بڑھا کر 45 فیصد کرنے کا ہدف مقرر کیا ہے، تاکہ ملکی معیشت کا تیل پر انحصار کم کیا جاسکے۔