تہران:ایرانی آرمی چیف میجر جنرل امیر حاتمی نے امریکی صدر ڈونلڈ ٹرمپ کے آبنائے ہرمز کو امریکی علاقہ قرار دینے کے بیان پر شدید ردعمل کا اظہار کرتے ہوئے امریکا کو سخت وارننگ دی ہے۔

ایرانی ذرائع ابلاغ کے مطابق میجر جنرل امیر حاتمی نے کہا کہ آبنائے ہرمز سے متعلق اس طرح کی باتوں کو مذاق سمجھنا بھی بڑی غلطی ہوگی۔ انہوں نے سخت لہجے میں خبردار کرتے ہوئے کہا کہ یہ ایران ہے اور اس کے محافظ کسی بھی جارحانہ اقدام کا بھرپور جواب دینے کی صلاحیت رکھتے ہیں۔

ایرانی آرمی چیف کا کہنا تھا کہ امریکی افواج کو عملاً خطے سے باہر دھکیل دیا گیا ہے اور اب انہیں خلیج، بحیرہ عمان یا آبنائے ہرمز میں داخل ہونے کی اجازت نہیں دی جائے گی۔ ان کے مطابق ایران اپنی سمندری حدود اور خطے میں موجود اپنے مفادات کے تحفظ کے لیے کسی بھی دباؤ کو قبول نہیں کرے گا۔

میجر جنرل امیر حاتمی نے مزید کہا کہ خطے میں موجود امریکی فوجی اڈوں کو دوبارہ ان کی سابقہ پوزیشن پر واپس آنے کی اجازت نہیں دی جائے گی۔ انہوں نے واضح کیا کہ ایران امریکی افواج کی دوبارہ واپسی کی کسی بھی کوشش کو قبول نہیں کرے گا۔

ایرانی آرمی چیف کا یہ بیان ایسے وقت میں سامنے آیا ہے جب واشنگٹن اور تہران کے درمیان آبنائے ہرمز کے معاملے پر کشیدگی میں اضافہ ہوگیا ہے۔ امریکی صدر ڈونلڈ ٹرمپ کی جانب سے آبنائے ہرمز کو امریکی علاقہ قرار دینے کی بات پر ایران نے سخت اعتراض کیا ہے۔

ایران آبنائے ہرمز پر اپنے اختیار اور خطے میں اپنی پوزیشن پر زور دے رہا ہے، جبکہ امریکا کی جانب سے سامنے آنے والے بیانات نے دونوں ممالک کے درمیان پہلے سے موجود کشیدگی کو مزید بڑھا دیا ہے۔

آبنائے ہرمز عالمی تجارت کے لیے انتہائی اہم سمندری گزرگاہ تصور کی جاتی ہے اور اس کے حوالے سے کسی بھی تنازع کے عالمی سطح پر بھی سنگین اثرات مرتب ہونے کا خدشہ ظاہر کیا جاتا ہے۔