تہران: ایران کے وزیر خارجہ عباس عراقچی نے یوکرین پر ایرانی تجارتی جہاز کو نشانہ بنانے کا الزام عائد کرتے ہوئے خبردار کیا ہے کہ تہران اس کارروائی کا جواب ضرور دے گا۔ انہوں نے حملے کو اقوام متحدہ کے منشور کی کھلی خلاف ورزی قرار دیتے ہوئے کہا کہ ایران اپنے قومی مفادات اور سلامتی کے دفاع کے لیے ضروری اقدامات کرے گا۔

اتوار کو سماجی رابطے کی ویب سائٹ ایکس پر جاری اپنے بیان میں عباس عراقچی نے دعویٰ کیا کہ یوکرین نے یہ حملہ صیہونی ریاست کے ایما پر کیا تاکہ یورپی ممالک کو بھی جاری تنازع میں شامل کیا جا سکے۔ ان کا کہنا تھا کہ اس معاملے پر انہوں نے یورپی کمیشن کی نائب صدر کایا کالاس اور روس کے وزیر خارجہ سرگئی لاوروف سے ٹیلی فون پر تفصیلی گفتگو بھی کی ہے۔

ایرانی وزیر خارجہ کے مطابق انہوں نے دونوں رہنماؤں کو واضح طور پر آگاہ کیا کہ کیف کی جانب سے ایرانی تجارتی جہاز کو نشانہ بنانے کی کارروائی کا مناسب جواب دیا جائے گا۔ ان کا کہنا تھا کہ ایران بین الاقوامی قوانین کے دائرے میں رہتے ہوئے اپنے مفادات کا ہر قیمت پر دفاع کرے گا۔

اس سے قبل ایران کی پارلیمنٹ کے نائب اسپیکر علی نیک زاد بھی خبردار کر چکے ہیں کہ ایران پر ہونے والے ہر حملے کا بھرپور جواب دیا جائے گا اور ملکی سلامتی پر کوئی سمجھوتہ نہیں کیا جائے گا۔

یہ بیان ایسے وقت میں سامنے آیا ہے جب ایک روز قبل یوکرین کے صدر ولودیمیر زیلنسکی نے دعویٰ کیا تھا کہ یوکرینی افواج نے بحیرۂ کیسپین میں ایک روسی جنگی جہاز کے ساتھ ایرانی جہاز کو بھی نشانہ بنایا، جس کی بعد ازاں ایرانی وزارت خارجہ نے تصدیق کی۔

واقعے کے بعد ایران نے تہران میں تعینات یوکرین کے ناظم الامور کو دفتر خارجہ طلب کر کے شدید احتجاج ریکارڈ کرایا۔ ایرانی وزارت خارجہ نے اپنے بیان میں حملے کو دشمنی پر مبنی اور مجرمانہ اقدام قرار دیتے ہوئے کہا کہ یہ اقوام متحدہ کے چارٹر کی شق 2(4) کی خلاف ورزی ہے اور اس سے خطے میں کشیدگی مزید بڑھنے کا خدشہ ہے۔

وزارت خارجہ نے اس عزم کا اعادہ کیا کہ ایران اپنی خودمختاری، قومی سلامتی اور مفادات کے تحفظ کے لیے بین الاقوامی قانون کے مطابق تمام ضروری اقدامات کرے گا۔