تہران: ایرانی پارلیمنٹ کے اسپیکر محمد باقر قالیباف نے امریکا کے اس دعوے کو مسترد کر دیا ہے کہ ایران بحال ہونے والے منجمد اثاثوں کی رقم سے امریکی زرعی مصنوعات خریدے گا۔

تفصیلات کے مطابق محمد باقر قالیباف نے سماجی رابطے کی ویب سائٹ ایکس پر جاری بیان میں امریکی مؤقف پر سخت تنقید کرتے ہوئے کہا کہ واشنگٹن کا یہ دعویٰ بے بنیاد ہے کہ ایران اپنے بحال شدہ منجمد اثاثوں سے امریکی زرعی اجناس خریدنے کا پابند ہوگا۔

انہوں نے طنزیہ انداز میں کہا کہ امریکا کی واحد فصل، جو ایران نے دیکھی ہے، وہ "بے اعتمادی" ہے، جو مکمل طور پر اس کی گھریلو پیداوار ہے۔

محمد باقر قالیباف نے مزید کہا کہ امریکی دعوے اس بات کی عکاسی کرتے ہیں کہ واشنگٹن جینیاتی طور پر تبدیل شدہ سویا بین، ٹوٹے ہوئے وعدے اور بے بنیاد بیانات برآمد کرنے میں زیادہ مہارت رکھتا ہے۔

واضح رہے کہ اس سے قبل امریکی صدر ڈونلڈ ٹرمپ نے دعویٰ کیا تھا کہ امریکا اور ایران کے درمیان طے پانے والے معاہدے کے تحت ایران کے 12 ارب ڈالر کے منجمد اثاثے بحال کیے جائیں گے۔ ان کے مطابق یہ رقم ایک مخصوص اکاؤنٹ میں رکھی جائے گی اور اسے صرف امریکی کسانوں سے مکئی، گندم، سویا بین اور ادویات کی خریداری کے لیے استعمال کیا جا سکے گا۔