تہران: ایرانی مسلح افواج کے سینئر ترجمان بریگیڈیئر جنرل ابوالفضل شکارچی نے کہا ہے کہ امریکی صدر ڈونلڈ ٹرمپ جنگ اور جاری بحرانوں سے نکلنے کا باعزت راستہ تلاش کر رہے ہیں۔

ایرانی میڈیا رپورٹس کے مطابق اپنے ایک بیان میں بریگیڈیئر جنرل ابوالفضل شکارچی نے کہا کہ امریکی صدر ڈونلڈ ٹرمپ زمینی حقائق پر عمل کرنے کے بجائے زیادہ تر نعروں، ٹوئٹس اور میڈیا مہمات میں سرگرم رہے ہیں۔

بیان میں ان کا کہنا تھا کہ ٹرمپ اب اپنے لیے ایک باعزت واپسی کی حکمت عملی بنانے کی کوشش کر رہے ہیں۔رپورٹس کے مطابق انہوں نے کہا کہ ایران نے عملی طور پر دنیا کو دکھا دیا ہے کہ اصل طاقت ایرانی عوام کے عزم، ایرانی جنگجوؤں کی جرات اور اسلامی انقلاب کے رہبر کی قیادت میں ہے۔

ان کا مزید کہنا تھا کہ امریکی فوج کو کبھی دنیا کی سب سے طاقتور فوج سمجھا جاتا تھا، لیکن آج عالمی رائے عامہ یہ سمجھ چکی ہے کہ اس طاقت کا بڑا حصہ پروپیگنڈا اور مبالغہ آرائی پر مبنی ہے۔

بیان میں ترجمان ابوالفضل شکارچی کا کہنا تھا کہ ایران نے میدان جنگ میں اپنے دشمنوں کو جواب دیا ہے اور آئندہ بھی دیتا رہے گا، نعرے، ٹوئٹس اور نفسیاتی جنگ امریکہ کے مسائل حل نہیں کرسکتے۔