لاس اینجلس :فیفا ورلڈ کپ 2026 کے دوران ایران کی ٹیم نے امریکی شہر لاس اینجلس کے سوفی اسٹیڈیم میں اپنے لاکر روم میں ایک ہاتھ سے لکھی گئی جذباتی خط چھوڑا ہے جس میں نہ صرف میزبان شہر کا شکریہ ادا کیا گیا بلکہ امن کی اپیل بھی شامل تھی۔خط میں لکھا گیا کہ قدیم فارس سے لے کر آج کے مہذب ایران تک، ایران کی روح آج بھی زندہ اور مضبوط ہے۔ اسی پیغام میں مزید کہا گیا کہ لاس اینجلس، آپ کی مہمان نوازی کا شکریہ۔ ہم فخر کے ساتھ یہاں آئے، عزت کے ساتھ مقابلہ کیا اور وقار کے ساتھ واپس جا رہے ہیں۔

پیغام میں دنیا بھر میں موجود ایرانی شائقین کا بھی شکریہ ادا کیا گیا جنہوں نے دو میچز کے دوران ٹیم کی بھرپور حمایت کی۔ نوٹ میں یہ بھی درج تھا کہ ہر اس ایرانی کا شکریہ جس نے ان 180 منٹوں کے دوران اپنا دل، آواز اور روح ایران کے لیے وقف کی۔

خط کے آخر میں امن کی اپیل کرتے ہوئے لکھا گیا تھا کہ تمام اقوام کے درمیان امن، احترام اور دوستی قائم رہے۔ خط میں 168 اور میناب کے ہیش ٹیگز بھی شامل تھے جو ایران کے شہر مناب میں ایک اسکول پر ہونے والے حملے کی طرف اشارہ کرتے ہیں، جسے جاری تنازع کے دوران ایک افسوسناک واقعہ قرار دیا گیا تھا۔

خیال رہے کہ یہ خط اس وقت سامنے آیا جب ایران نے بیلجیم کے خلاف 0-0 کا سخت مقابلہ برابر کیا، جس کے بعد ٹیم نے اپنے ورلڈ کپ کے اگلے مرحلے تک پہنچنے کی امیدیں برقرار رکھی ہیں۔ ایران کی فٹبال فیڈریشن کی طرف سے جاری کیے گئے اس خط میں ٹیم نے اپنے سفر، مشکلات اور جذبے کا ذکر کیا۔

یہاں ٹیم کی مشکلات سے مراد ، ورلڈ کپ کے دوران ایرانی ٹیم کو پیش آنے والے لاجسٹک مشکلات ہیں، کیونکہ ایران امریکہ جنگ کی وجہ سے امریکی حکومت نے ورلڈ کپ کیلئے ایرانی ٹیم کو امریکہ میں قیام کرنے کی اجازت نہیں دی تھی جس کی وجہ سے ایرانی ٹیم کو مجبورا اپنا بیس کمیپ امریکہ سے پڑوسی ملک میکسیکو منتقل کرنا پڑا تھا، اور میچز کیلئے ایرانی ٹیم کو طویل فاصلہ طے کرنا پڑتا تھا ۔ جب کہ اس سے قبل ایرانی فٹبال فیڈریشن نے متعلقہ حکام کو ایک درخواست دی تھی جس میں مؤقف اختیار کیا گیا کہ میچ سے دو رو ز قبل ایرانی ٹیم کو امریکہ میں قیام کی اجازت دی جائے تا کہ وہ پریکٹس کر سکے، مگر امریکی حکام کی جانب سے یہ درخواست رد کر دی گئی۔