ایران نے امریکا کے ساتھ طے پانے والی حالیہ مفاہمت کی تصدیق کرتے ہوئے اعلان کیا ہے کہ دونوں ممالک کے درمیان ایک نئے سفارتی مرحلے کا آغاز ہونے جا رہا ہے، جس کے تحت اہم سیاسی، اقتصادی اور جوہری معاملات پر تفصیلی مذاکرات کیے جائیں گے۔

ایرانی نائب وزیر خارجہ کے مطابق آج رات سے مختلف محاذوں پر کشیدگی کم کرنے کے اقدامات کا آغاز ہوگا، جبکہ بعض علاقوں میں جاری عسکری سرگرمیوں کو بھی مرحلہ وار محدود کیا جائے گا۔ انہوں نے کہا کہ اس عمل کا مقصد خطے میں استحکام پیدا کرنا اور مزید تصادم کے امکانات کو کم کرنا ہے۔

انہوں نے بتایا کہ آئندہ 60 روز کے دوران ہونے والے مذاکرات میں جوہری پروگرام، بین الاقوامی پابندیوں کے خاتمے، بیرون ملک منجمد ایرانی اثاثوں کی بحالی اور اقتصادی بحالی کے منصوبوں پر توجہ مرکوز کی جائے گی۔

نائب وزیر خارجہ کا کہنا تھا کہ ایران نے مذاکرات میں اپنے قومی مفادات کا مکمل تحفظ کیا ہے اور مستقبل کی پیش رفت کا انحصار معاہدے کی شرائط پر عملدرآمد سے مشروط ہوگا۔

ایرانی خبر رساں ادارے تسنیم کے مطابق حکام نے واضح کیا ہے کہ مفاہمتی دستاویز پر باضابطہ دستخط کے بعد اس کی تفصیلات جاری کی جائیں گی۔ تاہم تہران کا مؤقف ہے کہ معاہدہ کسی بھی فریق پر اندھا اعتماد نہیں بلکہ باہمی ذمہ داریوں اور نگرانی کے نظام کے تحت آگے بڑھایا جائے گا۔