تہران: ایرانی سرکاری میڈیا نے دعویٰ کیا ہے کہ امریکا بالآخر ایران کے ساتھ امن معاہدے پر رضامند ہو گیا ہے، جبکہ تہران نے اس پیش رفت کو اپنی حکمت عملی اور مزاحمتی پالیسی کی کامیابی قرار دیا ہے۔

ایرانی میڈیا رپورٹس کے مطابق ملک کی سپریم نیشنل سیکیورٹی کونسل معاہدے کی تفصیلات اور آئندہ کے لائحہ عمل سے متعلق جلد ایک باضابطہ بیان جاری کرے گی۔

ایران کے نائب وزیر خارجہ کاظم غریب آبادی نے کہا ہے کہ معاہدے کے تحت ایران کے خلاف عائد امریکی بحری ناکہ بندی کے خاتمے کا عمل آج رات سے شروع ہونے کی توقع ہے، جبکہ مفاہمتی دستاویز کا مکمل متن باضابطہ دستخط کے بعد جاری کیا جائے گا۔

انہوں نے کہا کہ حالیہ پیش رفت کے بعد مذاکرات کا ایک نیا مرحلہ شروع ہوگا جو 60 روز تک جاری رہے گا۔ اس دوران جوہری پروگرام، اقتصادی پابندیوں کے خاتمے، منجمد اثاثوں کی واپسی اور ایران کی اقتصادی بحالی سمیت مختلف اہم امور پر تفصیلی بات چیت کی جائے گی۔

کاظم غریب آبادی کے مطابق پابندیوں کے خاتمے اور مالیاتی رکاوٹوں کو دور کرنا مذاکراتی عمل کی بنیادی ترجیحات میں شامل ہوگا۔ اس کے علاوہ جنگی کشیدگی کے خاتمے اور تعمیرِ نو کے مختلف منصوبوں پر بھی تبادلہ خیال کیا جائے گا۔

ایرانی نائب وزیر خارجہ نے خبردار کیا کہ اگر معاہدے کی شرائط پر مکمل عملدرآمد نہ ہوا تو ایران مناسب ردعمل دینے کا حق محفوظ رکھتا ہے۔

واضح رہے کہ اس سے قبل وزیراعظم شہباز شریف اور امریکی صدر ڈونلڈ ٹرمپ بھی اپنے بیانات میں امریکا اور ایران کے درمیان امن معاہدہ طے پانے کا اعلان کر چکے ہیں، جس کی بعد ازاں ایرانی حکام نے بھی تصدیق کی۔