تہران:ایرانی وزیر خارجہ عباس عراقچی نے کہا کہ ایران کیلئے یورینیم ذخائر کا واحد حل مواد کو کم سطح پر لانا ہے،ہماری تلوار ہمیشہ آبنائے ہرمز پر لٹکتی رہے گی۔

ایرانی میڈیا رپورٹس کے مطابق اپنے ایک بیان میں وزیر خارجہ عباس عراقچی نے کہا کہ ایران امریکہ کے خلاف جنگ کا فاتح ہے، ایران امریکہ جنگ کے بعد مزید مضبوط ہو کر ابھرا ہے،مفاہمتی یادداشت پر ابھی دستخط نہیں ہوئے،تبدیلی ممکن ہے، جوہری معاملات بعد کے مراحل میں زیر بحث آئیں گے۔

انہوں نے کہا کہ جنگ کے خاتمے کا اعلان تمام محاذوں پر بشمول لبنان عبوری معاہدے کے تحت ہوگا، لبنان میں جنگ کے خاتمے کا مطلب قبضہ شدہ علاقوں سے صیہونی انخلا ہے، صیہونی ریاست جیسے دشمن ایران امریکہ معاہدے کے خلاف ہیں۔

رپورٹس کے مطابق بیان میں عراقچی نے مزید کہا کہ امریکہ کی ناکہ بندی ختم اور آبنائے ہرمز کھولنا عبوری معاہدے کا حصہ ہے،امریکہ کی دھمکیاں بند ہونی چاہئیں۔ انہوں نے دو ٹوک الفاظ میں واضح کرتے ہوئے کہا کہ عبوری معاہدہ پہلا قدم ہے، اگرمعاہدہ نافذ نہ ہوا تو جوہری مذاکرات نہیں ہوں گے،اور نہ ایران دباؤ میں آئے گا۔

عباس عراقچی نے کہا کہ آبنائے ہرمز کی مینجمنٹ جنگ سے پہلے کے دور میں واپس نہیں جائے گی، ایران آبنائے ہرمز میں جہازوں کی محفوظ گزرگاہ یقینی بنائے گا،ایران کے لیے یورینیم ذخائر کا واحد حل مواد کو کم سطح پر لانا ہے، ہماری تلوار ہمیشہ آبنائے ہرمز پر لٹکتی رہے گی،آبنائے ہرمز پر ایران اور عمان کی خودمختاری ہے۔

قبل ازیں سوشل میڈیا پر جاری بیان میں ایرانی وزیر خارجہ کا کہنا تھا اسلام آباد مفاہمتی یادداشت حتمی منظوری کے انتہائی قریب ہے، میڈیا کو مذاکرات سے متعلق قیاس آرائیوں سے گریز کرنا چاہیے، شفافیت اور ذمہ دارانہ طرز عمل کے تحت تفصیلات مناسب وقت پر عوام کے سامنے پیش کر دی جائیں گی۔