تہران:ایران نے امریکا پر مفاہمتی یادداشت کی شرائط کی خلاف ورزی کا الزام عائد کرتے ہوئے کہا ہے کہ واشنگٹن نے یکطرفہ اقدامات اور حالیہ فوجی کارروائیوں کے ذریعے معاہدے کی روح اور بنیادی ڈھانچے کو نقصان پہنچایا ہے، جس سے دونوں ممالک کے درمیان کشیدگی میں مزید اضافہ ہوا ہے۔

غیر ملکی میڈیا رپورٹس کے مطابق ایرانی وزارت خارجہ کے ترجمان اسماعیل بقائی نے تہران میں جاری بیان میں کہا کہ امریکا نے مفاہمتی یادداشت کے تحت طے شدہ ذمہ داریوں کی پاسداری نہیں کی بلکہ ایسے اقدامات کیے جو معاہدے کے مقاصد اور باہمی اعتماد کے منافی ہیں۔

انہوں نے الزام عائد کیا کہ حالیہ امریکی حملوں نے معاہدے کے بنیادی خدوخال کو متاثر کیا اور کشیدگی کم کرنے کے بجائے صورتحال کو مزید پیچیدہ بنا دیا۔ ان کے مطابق واشنگٹن نے ایسے اقدامات کیے جو مفاہمتی عمل کی روح کے برعکس ہیں اور خطے میں استحکام کے لیے نقصان دہ ثابت ہو سکتے ہیں۔

ترجمان نے مزید کہا کہ امریکا نے آبنائے ہرمز سے متعلق معاہدے کی پانچویں شق کو بھی نظرانداز کیا، حالانکہ اس اہم بحری گزرگاہ میں محفوظ جہازرانی کو یقینی بنانا ایران کی ذمہ داریوں میں شامل ہے۔ انہوں نے کہا کہ ایران بین الاقوامی بحری راستوں کے تحفظ اور خطے میں استحکام کے لیے اپنی ذمہ داریاں نبھاتا رہے گا، تاہم کسی بھی خلاف ورزی کو نظرانداز نہیں کیا جائے گا۔

اسماعیل بقائی نے واضح کیا کہ ایران اپنے قومی مفادات، خودمختاری اور سلامتی کے تحفظ کے لیے ہر ممکن اقدام کرے گا اور کسی بھی جارحانہ رویے یا دباؤ کے سامنے اپنے اصولی مؤقف سے پیچھے نہیں ہٹے گا۔ ان کا کہنا تھا کہ ملکی دفاع اور خودمختاری پر کوئی سمجھوتہ نہیں کیا جا سکتا۔

ایرانی ترجمان کا یہ بیان ایسے وقت میں سامنے آیا ہے جب مفاہمتی یادداشت پر دستخط ہونے کے باوجود تہران اور واشنگٹن کے درمیان اعتماد کا فقدان برقرار ہے اور دونوں ممالک کے تعلقات میں ایک بار پھر تناؤ بڑھتا دکھائی دے رہا ہے۔

واضح رہے کہ اس سے قبل امریکی صدر ڈونلڈ ٹرمپ ایران کے خلاف دوبارہ فوجی کارروائی کی دھمکی دے چکے ہیں اور ایرانی قیادت کو بھی سخت نتائج سے خبردار کر چکے ہیں۔ مبصرین کے مطابق دونوں ممالک کے درمیان بڑھتی ہوئی بیان بازی اور الزامات خطے میں نئی کشیدگی کو جنم دے سکتے ہیں، جس کے باعث عالمی برادری صورتحال پر گہری نظر رکھے ہوئے ہے۔