تہران: ایران نے قطر پر الزام عائد کیا ہے کہ اس نے تین ایرانی پائلٹس کو حراست میں رکھا ہوا ہے اور متعدد سفارتی کوششوں کے باوجود ایرانی حکام کو ان تک رسائی نہیں دی جا رہی۔

ایرانی حکام نے پہلی مرتبہ سرکاری طور پر دعویٰ کیا ہے کہ 2 مارچ 2026 کو قطر میں امریکی فوجی اڈے پر حملے کے بعد لاپتہ ہونے والے ایرانی فضائیہ کے تین پائلٹس قطری فورسز کے زیر حراست ہیں۔

ایرانی فوجی حکام نے بین الاقوامی کمیٹی برائے ریڈ کراس سے مطالبہ کیا ہے کہ وہ تینوں پائلٹس کی صورتحال معلوم کرنے اور ان کی رہائی کے لیے فوری اقدامات کرے۔

ریڈ کراس کو بھیجے گئے خط میں ایرانی فوجی عہدے دار بریگیڈیئر جنرل محمد باقر زادہ نے بتایا کہ 2 مارچ کو ایک مشن کے دوران پائلٹ ماجد کاظمی ہلاک ہوئے، جبکہ تین دیگر پائلٹس جواد صالحی، عبدالمجید دشتیان اور عمران بہروشیان کو قطر نے حراست میں لے لیا۔

ایرانی جنرل نے الزام عائد کیا کہ قطری حکام کا طرزِ عمل جنگی قیدیوں سے متعلق جنیوا کنونشنز اور دیگر بین الاقوامی قوانین کی خلاف ورزی کے زمرے میں آتا ہے۔

انہوں نے کہا کہ ایرانی حکام نے تینوں پائلٹس تک رسائی حاصل کرنے، ان سے ملاقات یا ان کا انٹرویو کرنے کے لیے متعدد سفارتی کوششیں کیں، تاہم اب تک انہیں اس کی اجازت نہیں دی گئی۔

ایرانی فوجی عہدے دار کے مطابق تینوں پائلٹس کو اپنے اہل خانہ یا اپنے مقدمے سے متعلق حکام سے رابطے کا موقع بھی فراہم نہیں کیا گیا۔ ایران نے ریڈ کراس پر زور دیا ہے کہ وہ معاملے میں فوری مداخلت کرے اور زیر حراست پائلٹس کی سلامتی، قانونی حیثیت اور موجودہ صورتحال کے بارے میں معلومات حاصل کرے۔

ایران کا یہ دعویٰ ایسے وقت سامنے آیا ہے جب تہران اور دوحہ کے درمیان سفارتی سطح پر بھی معاملہ اہمیت اختیار کر گیا ہے۔ تاہم قطر کی جانب سے ایرانی پائلٹس کو حراست میں لیے جانے کے دعوے پر تاحال کوئی مؤقف سامنے نہیں آیا۔